高志森之前曾買了幾百個亞視新聞時段廣告，早前因亞視新聞停播，令他有所損失，現在亞視玩完，高志森說：「都算甩難，喺亞視復播番新聞嘅時候，已經播晒我買嘅廣告，好好彩！不過，由於佢哋要三月前播晒剩番嘅廣告，所以試過一個鐘頭內出現我嘅廣告三、四次，好密集，唔少人都睇到呢個廣告。」

江美儀：「之前喺亞視，公司規模細，每個崗位都做過，朝早拍有關車嘅節目，中午拍婦女節目，夜晚就做戲劇，喺我眼中亞視就好似一間學校咁，到我去無綫後，就好快適應各類工作。」

徐小明：「唔知係咪預感，日前約咗啲舊同事返去影相，真係有啲唏噓，就算停播，點解唔畀大家有個心理準備？（政府冇幫電視業？）我一路都話佢哋唔關心電視，睇吓啲負責嘅首長、官員，冇見佢哋約過有關人士傾偈，亞視困難，有冇磋商過，解決困難？（會喺電視機前等熄機？）我唔忍心睇到呢一刻。」

林建名：「可惜，嗰陣我喺董事局，每次要拎錢就要返去開會，都億億聲，做得辛苦，每年唔見一億，但有好嘅製作，《我和殭屍有個約會》同《百萬富翁》。（浪費咗Daddy林百欣心機？）係！唔只係我哋心機，仲有香港人心機，非常唏噓！」