DJ瑪姬日前下定決心剪去一把長長秀髮，以全新短髮Look迎接新一年！她更為此拍下多款趣怪自拍，向大家展示新形象！只見她分別擺出性感咬手指、嘟嘴及伸脷等表情，實行「迷暈」粉絲！

瑪姬以短髮新形象示人，冇變師奶之餘，仲好誘人添！

瑪姬搞笑自爆「力排眾議」才得以剪去長髮，皆因家人及朋友均作反對：「我三、四年前就已經想剪短，但因為司儀工作經常要Set頭同着晚禮服，長髮顯得高貴啲！加上朋友同我個髮型師表弟成日話我頭大，唔適合短髮同會變師奶，阻止咗我好多次！」她又笑言曾與朋友開玩笑，若嫁人生子便會剪髮：「我講笑話嫁得出同生仔就會剪，但一路都嫁唔出！所以我今年就一心剪短去迎猴年，好彩剪完大家都讚適合我！」

問到自從去年碩士畢業後有何大計？瑪姬笑言會努力填詞出歌：「主持同司儀我會照做，但會做番多啲音樂嘢，我一直為新歌填緊詞，希望今年上半年度可以出到歌！」