現年28歲的陳庭欣(Toby)一直與翟威廉傳緋聞,不過自認工作狂的她認為「力不到不為財」,近年積極衝刺事業,結果遭前度埋怨不夠小鳥依人,最終不歡而散!至於翟威廉是否符合其擇偶條件?Toby自嘲犯賤鍾情壞男人,笑他太宅超冇癮!

陳庭欣個性獨立,最怕男仔照顧周到又黐身,結果與前男友不歡而散。

陳庭欣

陳庭欣連放假嘅時間表都排到密密麻麻,工作狂當之無愧!

陳庭欣(左起)與陳貝兒、區永權及郭嘉文加入《東張西望》任主持。

在《鐵》劇中,陳庭欣與袁偉豪不乏親熱戲,睇到觀眾火辣辣!

陳庭欣隔空「打情罵俏」笑翟威廉宅爆,真係冇曖昧?

陳庭欣近年大解放,與一眾咪神、宅男女神相比絕不遜色!

陳庭欣2010年當選港姐冠軍後,一直為無綫綜藝節目及大型慈善騷擔任司儀,其後又參演劇集《愛.回家》、《名門暗戰》及《樓奴》等,角色多是專業人士和斯文靚女,直到近年,面對一眾後起的「咪神」、「宅男女神」,擁34D火辣身材的Toby終於大解放,頻頻晒「蜜桃胸」上位!早前於無綫劇《鐵馬戰車》中,Toby更與袁偉豪(Ben)上演激情床戲,掀起熱話!

犯賤鍾意壞男人

Toby在《鐵》劇中周旋於Ben和陳智燊(Jason)之間,前者心思縝密又夠Man,可惜經常口甜舌滑,氹人幫自己完成工作;後者則是體貼兼愛屋及烏的「高富帥」。現實中,Toby又會如何選擇呢?與翟威廉緋聞傳足多年的她笑說:「好難揀,現實都冇遇到,所以唔知點樣,冇乜遇到咁高質嘅Jason同Ben。(唔怕貶低身邊嗰個?)唔會!」不過她搞笑自稱性格「犯賤」,較喜歡壞男人:「對自己冇咁好,或者性格冇咁完美嘅男士,我覺得會有興趣多啲,當然佢都要工作至上。」

Toby又自認工作狂兼勞碌命,隨年齡增長,現已不會愛情至上,對另一半亦有同樣要求:「有啲人一定要慶祝某啲日子,好似情人節、生日,我就唔係嗰種人,如果有人非常關心我、幫我安排晒所有嘢,反而我會卻步。我覺得男士將工作放第一位最好,過分體貼就唔得,有啲男仔鍾意管接送,我又唔得,因為我好鍾意揸車,加上我會畀意見揸車嗰個人。」

她自認衰在不夠女性化、不夠小鳥依人,又覺得「力不到不為財」,放假都要將行程安排得密密麻麻,最怕別人畀驚喜,因此曾遭前男友埋怨:「我唔想花時間去旅行,尤其做呢行如果請假,會冇咗啲工作機會,或者阻人拍攝進度,就算我去旅行都去得唔安樂!試過有男友計劃喺我生日去旅行,叫我到時執齊嘢上機就得,其實係一件好浪漫嘅事,我明白佢好有心,但我就遲遲畀唔到期佢,加上當時有工作在身,大家為呢件事嗌交嗌得好犀利,最後都不歡而散。」經此一役,再加上好友的勸告,Toby承諾會改變一下這種個性。

嫌翟威廉又宅又閃

談到「男友」翟威廉專注工作又不黐身,剛好符合其擇偶要求,自認麻煩的Toby卻笑着否認:「唔係!錯!我要強烈地否認!佢好宅,連出街食飯都嫌遠,大家約食飯都要就佢去鑽石山,佢覺得鑽石山Is The Best!我覺得咁又冇癮得滯。(需要浪漫?)雖然講到好唔需要咁,但女仔有時候都需要。」問到是否覺得合襯時,她又似是而非地說:「我係唔排除同任何人嘅機會。(唔係一齊咗咩?)冇呀,從來冇講過。(佢性格啱你?)相信佢嘅性格喺任何人心目中都好正義、正面,甚至有時係悶添!所以我哋都好努力帶佢出去。」她認為浪漫並非建立於物質上,反而着重心靈上的溝通,又盼另一半能感受其工作忙碌,偶而致電或傳短訊關心便足夠:「我會想見吓對方,但唔使做好多嘢,去茶餐廳見一見面,或者喺車上傾吓偈就得,希望大家互相遷就對方時間,經過咁多年,我覺得有共同價值觀最重要。」

身為工作狂的Toby,近期主持《東張西望》外,Toby透露將於新劇《致命復活》中有大突破,飾演小三兼與郭晉安上演床戲,更會到越南拍攝綁架戲份,並慘遭強姦虐待致死!恨與劇中對手「開花結果」的她,被問到想跟哪位男神合作?Toby說:「黃子華!之前睇番《男親女愛》,佢真係好正!我好想參與續集!(代替『Miss Mo』鄭裕玲嘅地位?)又唔好話代替,Miss Mo永遠都係Miss Mo嗰個位,我有得做側邊嗰個已經可以學到嘢。」她更盼望參演喜劇,即使扮醜也不介意:「我覺得幾好笑。(唔怕破壞形象?)我覺得唔可以再成日記住自己係港姐,依家觀眾鍾意重口味嘅嘢,好似阿Bob(林盛斌)咁受歡迎,佢嘅造型、講嘢都好爆,蝦頭(楊詩敏)都係另一個例子。」

坐定定做主持壓力大

事業心重的Toby希望主持、拍劇双線發展,談到近日加盟《東張西望》做主持,面對一周五天的現場直播,雖然曾多次擔任大型節目司儀,經驗豐富,但她也倍感壓力:「拍劇都有壓力,但至少唔係直播,就算做得幾差、NG、食螺絲,我都有機會重拍。(做慣司儀都有壓力?)唔同,我覺得自己企喺度做精靈過坐喺度講嘢,一坐喺度就變得好斯文、拘謹,所以依家都戒緊!」

文:黎寶倫

攝:唐豁莊