分別為2010年港姐冠軍及亞軍的陳庭欣（Toby）和張秀文，日前被《好報》揭露兩人至今仍是「無殼蝸牛」，並與家人蝸居公屋，名副其實「公屋港姐」！現居「A1屋邨」啟晴邨的Toby為升呢做業主亦慳到盡，有車之人的她更不諱言選了最慳油的車。

Toby至今仍為升呢做業主而努力工作。

張秀文表示絕不因住公屋而感到自卑。

最新一期《好報》踢爆陳庭欣和張秀文蝸居公屋。

Toby與翟威廉不介意撐枱腳被撞破，更揮手打招呼。

為了慳錢，Toby唔介意逼港鐵。

Toby跟翟威廉齊齊返家。

陳庭欣（Toby）被最新一期《好報》踢爆自任職公務員的父親退休後，一併被安排入住曾發生食水含鉛超標事件、退伍軍人症確診個案及槍擊案的「A1屋邨」九龍灣啟晴邨，為免港姐光環鋒芒太露，Toby出入啟晴邨時亦非常低調，不但刻意戴上口罩，更被《好報》拍得她於回家途中「高度戒備」低頭急步「回府」。

承認搵男友

為圓上車夢，Toby亦慳到盡坐港鐵，更親自到洗衣店磅洗。對於她現居「A1屋邨」，她昨日接受本報訪問時不願多談，但坦承父母的確於上址居住，至今仍為升呢做業主而努力：「呢排都真係幾慳，想努力工作買樓，就算揸車都揀隻慳油。（Dream House？）最緊要爸媽鍾意！」

談及報道指她有男友翟威廉「照住」時，她說：「我哋間唔中都會出嚟食吓飯，嗰日其實係去佢屋企樓下商場，個個朋友搵親佢都就佢喺樓下食。（快啲嫁人就快啲換到樓？）呢啲嘢唔勉強，依家都好Enjoy靠自己搵錢。」

唔覺得輸蝕

至於與Toby同屆的港姐亞軍張秀文亦為公屋出身，現時與家人同住於馬鞍山耀安邨，最近憑34D獲封「新一代咪神」的她則表示絕冇因住公屋而感自卑：「一出世就住呢度，唔會覺得輸蝕畀人，係好平常嘅事，咁仲好啦，令我更獨立！」她亦坦言想盡快搵到第一桶金買樓：「以前都想喇！但一直追唔到樓價，到近排事業有起色又再諗番，希望四至五年內達成啦！」

文：專案組