徐子珊早前到加拿大登台搵銀，獲觀眾熱情狂派利是，笑指全程要踎住唱，期間又被女狂迷捉住唔放！演出後，她留在當地度歲，賞雪兼玩雪，自言貪靚玩Selfie，搞到手指僵硬才罷休，面對白皚皚的雪景，她不諱言感受到單身的浪漫！

子珊成個人趴在雪地上玩雪，睇見都凍！

子珊與馬國明到外地登台，狂收利是。

子珊在當地旅遊，擺咀嘴甫士。

徐子珊早前聯同馬國明到多倫多登台，期間到尼亞加拉大瀑布賭場開騷，適逢農曆新年，酬勞雙倍之餘，當然扛利是也同樣逗到手軟！子珊透露為求攞意頭逗利是，事前已計劃演出時自行上前與貴賓觀眾握手，沒料到大會卻以安全為理由，拒絕他們有此舉動，幸而到正式演出時，一眾觀眾比預期中熱情，紛紛走上前豪派利是，令二人豐收而回！

被捉實嗌放手

對於觀眾的熱情，子珊照單全收：「收到幾十封利是，入面唔係港幣，全部係美元同加幣，好開心！我未試過全程踎住唱，又同佢哋影合照，有啲又好有趣，有個女仔係咁捉住我隻手唔放，我咪即刻喺歌詞度加『放手』兩個字甩身囉！」

High爆玩堆雪

演出後，子珊會合當地朋友留下度歲，特別走去賞雪，雖然當地氣溫零下15度，但她甫見飄下來的雪又白又軟即大感興奮，童心未泯玩堆雪，又到瀑布前留影，當然不忘Selfie留念，惟拍了沒多久便難抵低溫：「本身冇預落雪，點知去到見到好開心，仲要係啱啱落咗冇耐，啲雪又軟又白雪雪，好靚！但真係凍到笑唔到，啲手指長時間外露僵硬晒，影咗一陣即刻走入室內，買番杯熱咖啡保暖。」她指每日起床便看到窗外雪景，倍感浪漫，問到為何不找男伴感受浪漫？她笑說：「單身都有單身嘅浪漫，今次冇艷遇！」談到旅程難忘事，子珊表示參觀某野生動物展覽時，看見一些拍攝者僅得十歲、八歲，但攝影技術絕不遜色，令其大開眼界，亦是攝影愛好者的她亦自嘆不如。

文：影視組