日本歌姬濱崎步上周日駕臨澳門新濠影滙綜藝館，欣賞美國樂壇天后麥當娜（Madonna）開騷。濱崎步百忙之中接受本報訪問，揚言被場館的音響及特效吸引，有望首降澳門演出！

濱崎步坦言首次睇麥當娜演唱會，興奮莫名。

濱崎步被新濠影滙的音響及舞台吸引，希望首降澳門開個唱。

濱崎步到《蝙蝠俠夜神飛馳》場館外坐上蝙蝠俠戰車。

有「日本麥當娜」之稱的流行天后濱崎步，本月中因身在英國錄音，錯過了麥當娜在日本的巡唱。今次濱崎步特別親臨澳門新濠影滙睇騷，識英雄重英雄的她說：「我一直以來都未睇過麥當娜開騷，今次係第一次，感覺相當興奮！（你被封日本麥當娜？）從未聽過有人咁叫我，哈哈！不過仍然覺得好榮幸。」

試坐蝙蝠俠戰車

濱崎步將於5月展開新一輪日本巡唱，多年沒來港開騷的她，自爆有意於今年再辦亞洲巡迴演唱會，除香港外，亦期望再到上海開騷。問到今次睇騷會否令她心郁郁到澳門開個唱？她表示相當有興趣，還大讚新濠影滙綜藝館超乎國際水準的音響設備和舞台設計，相信她有望重臨澳門開處女騷，消息定必令不少亞洲歌迷興奮！

多年前曾到澳門拍攝雜誌寫真的濱崎步，今次重臨濠江，驚嘆澳門的變化很大：「我雖然唔係好記得上次嚟實際見到咩，但真係唔同晒，好似去咗美國拉斯維加斯咁，之前嚟好似好細，依家規模好大！」

走在潮流尖端的濱崎步，對於新濠影滙的全新娛樂設施當然不會放過，她透露想坐「影滙之星」8字形摩天輪及試玩全球首個以蝙蝠俠為主題的4D飛行體驗《4D蝙蝠俠夜神飛馳》。

訪問結束後，她急不及待到《蝙蝠俠夜神飛馳》場館外坐上蝙蝠俠戰車，又於駐場魔術大師Franz Harary主理的魔術匯演Mega Magic門外留影。當她見到場外的賓尼兔裝飾時，更童心未泯影相，並將相片放上Twitter，身體力行向歌迷推介新濠影滙的好玩娛樂設施。

文：外娛組