崔碧珈昨日宣傳新戲時中門大開，以搓湯圓絕技震撼全場，更預告首映時或會更性感！搓湯圓時同樣透出事業線的莊思敏，大讚崔碧珈酥胸半露夠煞食，並自爆準備稍後再出絕招：「首映大家去盡啲！」文：影視組

崔碧珈企定定都已經夠晒震撼，轉個頭仲烏低身搓湯圓，叫人點頂？

陳婉衡收到噩耗，但仍頂硬上。

莊思敏暫時留力，等首映先「去盡啲」！

眾女齊齊餵拍檔食愛心湯圓！

莊思敏（Jacquelin）、崔碧珈（Anita）、岑日珈（Angie）及陳婉衡（Alycia）等，昨日到西九龍中心宣傳新片《PG戀愛指引》，並即場搓湯圓慶祝元宵節。當中最性感的要數中門大開的崔碧珈，見她一步一驚心，令現場龍友谷血上腦！她受訪時否認存心搶鏡，堅稱性感戰衣由造型師準備：「我嚟到先知件衫係咁，黐咗好多膠紙，本來仲特登着條長嘅打底褲嚟！」她預告首映時或會作更大膽的打扮：「公司都有Remind要切合番套戲嘅Theme，要Sexy啲！」

岑日珈無端端剝光豬

同場女星明顯不敵Anita的「巨型湯圓」，但Jacquelin搓湯圓時都隱約透出事業線，未算輸得太多，又笑言喜見Anita酥胸半露：「我都有同佢講我鍾意佢咁着！」並揚言不介意被搶鏡：「商場活動一、兩個性感都好足夠，首映大家去盡啲！」

至於向來性感的Alycia狀態大跌，受訪時更難掩傷感：「一起身收到一位前男性上司離世嘅消息，之前約見面約唔成，太突然！」而Angie的父親早前急病入院，她透露父親現時情況穩定：「但嚟唔到首映，之後再同佢睇。老一輩保守啲，佢以為我戲入面冚住張被嗰場戲係冇着衫，要慢慢同佢解釋番。」又表示元宵節等追求者約。