呂晶晶焗乳豬餵飽未來老公

亞姐冠軍出身的呂晶晶近年簽約諸葛紫岐旗下發展，熱愛運動的她獲邀於電影中演性感女特務，更為此誓要操靚Body。然而她直言對下廚相當有興趣，瞬間切換為賢淑小女人！今次她更首度挑戰西班牙烤焗乳豬配橄欖油焗薯，務求學煮更多美食佳餚，令未來另一半大飽口福！只見平日入開廚房的晶晶由將全隻乳豬塗上醬料、斬件兼放入焗爐、煮製醬汁及裝飾製成品等等亦得心應手，全程皆有板有眼。

挑戰棘手菜式

晶晶自爆對食譜過目不忘，更會耐心重複挑戰棘手菜式：「可能巨蟹座嘅人都好居家同鍾意煮嘢食，我好有興趣學廚，成日上網搵食譜。我睇電視節目望咗一下就記得食譜，買咩同煮咩都好易入腦。（下廚有天分？）對自己有興趣嘅事物會好快記得！（有時同食譜煮得唔一樣？）我會係咁煮同係咁試，鍾意食就會好有心機煮多次。（有咩棘手菜式？）炆花膠、冬菇同海參都難搞，水同蠔油嘅分量落得唔啱，煮出嚟汁太稀同太鹹！」她又笑言試過不慎煮出「焦炭牛扒」：「冇試過火燒廚房，但整燶嘢就一定有！第一次煎牛扒變11成熟，又硬又唔Juicy，真係超難食！」問到閒時會否「露兩手」為家人及朋友下廚？晶晶自認追求完美，故未敢於朋友面前獻醜：「我為父母煲過湯同煮飯，但真係冇試過煮畀朋友食。因為我唔敢獻醜，比較追求完美，要整到好靚先會攞出嚟招呼朋友。有時覺得自己煮嘅味道OK，但賣相唔夠！不過目前我煮洋葱豬扒都整得幾靚仔，下次影吓相上載去社交平台畀人品評吓，之後再招呼朋友食。」

年輕男士追求

晶晶搞笑自爆經常「師奶仔」上身，衝入超市爭買平價食材：「超市或大商場周年大減價會好多人，咁我就戴眼鏡同帽喬裝吓，衝夠入去兩、三次！（去咁多次？）買一次拎唔到咁多，但返屋企又覺得買唔夠，所以決定再去，買完食物就再衝去用品部！我覺得自己都幾師奶仔，唔知點解會有呢啲嗜好，哈哈！（學做節儉好老婆？）希望啦！主要想自己煮會食得健康啲。」晶晶笑言平日早收工亦會下廚，談到經常練習廚藝的她日後應會令另一半有口福？她認真地表示日後會炮製出餐廳水準的美食「餵飽」未來老公：「我依家一個人煮就賣相求其，味道OK就得。但煮畀另一半就會好畀心機煮，整到去餐廳咁靚！希望我嘅廚藝可以進步啦！到時攞出嚟睇得又食得就最好喇！」

晶晶目前渴望向大家展示不同方面的自己，更想試行淑女路線：「我好耐冇着可愛嘅泡泡裙，有時想畀人感覺型啲，有時畀人感覺可愛啲，依家想試吓變淑女，形象高貴啲！」問到轉換成熟形象後會否吸引較年長的異性？她大爆反而引來年輕的追求者：「以前我可能鍾意同成熟嘅人做朋友，不過依家多咗好多年紀比我細嘅朋友。（當中有冇追求者？）都有嘅，不過始終自己工作為先。（接受姊弟戀？）男仔比女仔遲發育，相差四至五歲就細我好多，以結婚角度睇可能就唔太適合。」

髮型及化妝：HANA

服裝：snidel

場地及食材：WOODS

後記 行山練功力保索爆身材

外表嬌滴滴的晶晶預告於鏡頭前穿型格緊身衣當打女，然而她於鏡頭外同樣勤於舞劍練功及行山，力保索爆身材！其實打得又睇得的晶晶連廚房都入得，雖然她首次面對未經處理的原隻乳豬時一度表現失措，但亦很快上手及盡展經常入廚的功架，稱呼晶晶做「美女廚神」亦不為過！

文：孺　

攝：吳文聰