王宗堯Christy街頭鬥面黑

37歲的王宗堯與22歲模特兒女友黎紀君（Christy）經常高調晒愛，但日前卻因「搵食」問題在街頭鬧小風波！當晚他倆拖手現身灣仔街頭，進出多間食肆仍不合心水後開始鬥躁底，宗堯面黑黑拎起手機上網搵餐廳，Christy則翹起雙手兼擰歪面，火藥味甚濃！其後他倆步往取車，宗堯見女友嬲嬲豬，急步走上前拖實，又搭着伊人膊頭咬耳仔，終成功呵番女友，熄晒火的Christy攬實男友的腰，再化身連體嬰繼續搵食之旅。