甄子丹雲狄素 高手過湊仔招
「宇宙最強」甄子丹與荷里活巨星雲狄素（Vin Diesel）於多倫多拍攝新片，首度跟雲狄素合作的子丹，大讚拍檔是位非常疼錫家人的好男人，他們平日除談劇本外，最愛談的便是「湊仔經」！對於外傳取代李連杰拍攝該片，子丹表示跟李連杰是演兩個不同的角色，並不是取代他！
子丹同雲狄素兩位動作巨星都勁錫家人，鐵漢背後原來愛談湊仔經！
子丹和Tony Jaa廿年前曾一起工作，今次再合作當然默契大增呀！
剛拍畢荷里活電影《星戰》外傳《Rogue One：A Star Wars Story》的甄子丹，早前飛往多倫多為另一部荷里活電影《3X反恐暴族3》（xXx：The Return Of Xander Cage、《3X3》）開工，與荷里活巨星雲狄素（Vin Diesel）合作，兩位原來有不少共通之處，熱愛工作之餘，亦很疼錫家人。與女友Paloma Jimenez育有三名子女的雲狄素，外表粗豪但其實很喜歡湊小朋友！子丹昨日於多倫多接受本報獨家電話訪問，笑談這位新拍檔，他說：「我哋平時當然會傾劇本嘅嘢，因為佢亦係今次嘅監製，大家都會希望諗到一啲嘢，令世界各地嘅觀眾喜歡。除此之外，我哋最喜歡傾嘅就係湊仔經，佢好錫屋企人，係一個Family Man，一個以家庭為重嘅人，同我一樣都覺得拍戲還拍戲，家庭先係最重要！佢女朋友都有喺片場，佢同詩詩都好好傾，都係傾屋企嘢。」
冇取代李連杰
近年不少亞洲藝人勇闖荷里活，像周杰倫接拍《非常盜2》、「小鮮肉」吳亦凡繼接拍洛比桑電影《Valerian》後，再獲荷里活電影商垂青，早前電影公司公布《3X反恐暴族3》演員名單，除雲狄素、子丹、森姆積遜（Samuel Ｌ. Jackson）和Tony Jaa外，吳亦凡亦有參與拍攝，期間更與雲狄素齊擺「X」手勢合照。
另外，早前有指取代李連杰拍攝該片，對此子丹受訪時澄清跟李連杰演的角色不一樣，所以並不是取代。對於有這樣的誤傳，子丹沒有不開心：「其實每次拍戲，最緊要係可以嘗試到一啲未試過嘅角色，今次嘅打法好特別，好X-Game，我同雲狄素將會上天下海咁打，係New Generation（新世代）嘅007，好有挑戰性！（有傳你今次演反派？）邊個話係反派？但礙於要保密，不便透露詳情。」
同Tony Jaa相認
因剛開工不久，子丹跟雲狄素暫未正式拍攝打戲，昨日剛拍攝一場雲狄素講普通話的戲份，在旁的子丹即充當導師，又大讚雲狄素很有語言天分，是個很聰明的人。除了雲狄素之外，子丹今次亦會跟「拳霸」Tony Jaa合作，Tony Jaa在新戲中飾演其手下，原來兩人廿年前曾一起工作，更在首日開工時「相認」，子丹說：「佢第一日開工就問我有冇去過泰國Thong Krut，我話廿幾年前去過拍戲，佢話當時做緊茶水、武師一腳踢，當時見過我好記得，今次見面講番，幾有趣！」
文：影視組
