無綫藝員龔嘉欣、陳智燊、劉佩玥和湯洛雯等昨日在將軍澳電視城出席《明珠台2.22 TVB數碼頻道新安排記者會》。無綫數碼頻道將於本月22日作出重整，翡翠台（81台）提升至高清畫質，現有的高清翡翠台（85台）將改名J5變成財富與知識頻道。「數碼明珠台」（84台）信號調整後，觀眾需重新搜台才能繼續收看。明珠台於本月起推出不少重頭節目包括「歐美劇集」《閃電俠（II）》、《女超人》、《X檔案》；「真人騷/時事資訊節目」《碧咸：足球狂熱》、《福島核劫》及一年一度的《奧斯卡頒獎禮》等。

龔嘉欣笑言Dry到流鼻血，有冇咁陰功吖？

劉佩玥戥兩位蜜運中的好姊妹陳瀅及何雁詩幸福。

陳智燊稍後與未婚妻宋熙年往澳洲拍攝節目，卻擔心會有拗撬。

湯洛雯（右起）、梁嘉琪和麥美恩宣傳無綫明珠台的新節目。

「追殺」吳業坤

龔嘉欣笑言在剛過去的情人節，Dry到流鼻血：「可能太乾燥，喺屋企練歌練到流鼻血，真係Dry爆情人節。（冇人約？）有人約，但唔想太多緋聞，洗吓底幾年先。」 談到《愛.回家》將大結局，嘉欣表示收到995集大結局劇本才知道，劇集約三月拍完，大家開工時都會感到不捨，故不時在廠內拍照留念：「遲啲去美加登台，登台後會拍一個廣告，呢個劇總共帶挈咗我三個廣告，但同吳業坤冇得比，但佢死都唔肯派利是畀我，話演員唔使派，我實追殺佢！」

陳智燊怕同宋熙年嗌交

最近忙拍新劇《一屋老友記》及《幕後玩家》的劉佩玥表示，情人節收工後約了陳瀅食飯，問她豈不是變成電燈膽？她笑說：「邊個係電燈膽都唔知，可能係佢阻住我哋呢！我同陳瀅見面，猷亨唔喺度。」又大讚陳瀅和何雁詩沒有重色輕友。手臂有數條傷痕的劉佩玥笑說：「拍外景少少碰撞實有，之前生風瘌仲驚，幾有礙觀瞻！聽黃翠如講即刻去醫院打針，之後有睇中醫，叫我要多休息調理。（捱夜捱出病？）夜晚工作在所難免，惟有玩少啲，早啲瞓，食得清淡啲。」

而陳智燊透露情人節將花收在車尾箱，為宋熙年帶來驚喜。他又稱正籌備12月的婚禮，稍後會與宋熙年到澳洲拍攝節目，卻擔心會嗌交收場。