黃翠如與蕭正楠（Edwin）昨日拍攝新劇的婚禮戲份，身穿婚紗現身的翠如透露劇中與黃宗澤（Bosco）有親密接觸，男友Edwin即大爆已向Bosco「動粗」報復：「打咗佢啦！」

Edwin及翠如身穿禮服拍結婚戲份，十足預演婚禮！

撞傷肋骨的Bosco不時隱隱作痛，要用手輕撫紓緩。

不停嗌凍的翠如身披大褸，搞到身旁的Edwin大感心痛。

黃翠如、蕭正楠、黃宗澤及張繼聰等昨日在淺水灣拍攝無綫新劇《幕後玩家》的婚禮戲份，化身新郎與新娘的Edwin及翠如全程怕醜兼尷尬。問到心情如何，身穿露肩婚紗的翠如笑言只覺得好凍，而Edwin即激讚女友靚：「結婚真係唔好揀冬天，佢就淒涼，露晒肩咁！（你心痛？）但咁着又幾好睇。」提到今次似足預演婚禮，翠如即大唱反調，透露稍後將在劇中與Bosco有親密接觸。問到Edwin會否呷醋，他搞笑大爆已向Bosco「動手」：「打咗佢啦！劇中我同佢係好兄弟，但佢搶走我老婆，所以拍咗場兄弟爭執戲份。」

浴室滑倒傷肋骨

問到二人拍過結婚戲後會否找到感覺，日後結婚更順利，翠如怕醜將咪高峰遞給男友，Edwin見狀笑說：「你平時講嘢好叻(口架)？結婚一生人一次，咪喺場戲經歷咗，不過我哋都會專業演出。」問到打算何時結婚，Edwin笑言未知，翠如則稱當今次為預演婚禮及影婚照。

而同場的Bosco則大呻因猴年犯太歲而「周身病痛」，繼早前頸骨移位及手肘受傷後，昨日又在浴室滑倒而撞傷肋骨，直言要媽媽幫手攝太歲。他又大爆與劉佩玥在劇中有多場激吻戲。

張繼聰喜爭男配

至於張繼聰談到入圍《金像獎》「最佳男配角」，他直言相當開心，當時第一時間致電導演張家輝報喜，但他睇好白只得獎：「我買重佢。（冇信心？）有，但我對佢更有信心。」

文：影視組