去年《東網巨星》的《我愛發哥》專題哄動全城，神級影帝周潤發與25位星級藝人隔空互動，笑料及金句源源不絕！今年發哥亦簡單接受了幾位星級嘉賓提問，第一擊是新一屆視后胡定欣，定欣誠邀發哥行山自拍，但搞笑的發哥笑言定欣已找到Band友男友陳明道，怕會傳出緋聞，並拉埋定欣好友單立文（豹哥）及胡蓓蔚（豹嫂）落水，提議四人上山！

發哥激讚定欣和阿田在《鬼》劇中的「神同步」演出。

定欣：發哥呀發哥！好耐冇見呀！你仲記唔記得我哋幾年前喺尖沙咀偶遇過，我嗰次好開心，係第一次見到你，但你感覺好似認識我、知我係邊個咁，我開心咗一日呀！你對人好尊重好愛護，呢樣好值得我哋欣賞、學習，其實我有個小小遺憾，我當時太緊張，唔記得同你影相，我好羨慕好多人撞到你，但我之後就冇再撞到你，希望下次你行山叫埋我吖，我哋再自拍吖！

發哥：你好似搵到個音樂家喇喎！就唔係太方便，豹哥介紹咗呢個男士畀你喇！等你同嗰件散散哋先約我啦！費事又搞出啲咩……吓話！就唔好啦！呀！一係咁，除非你叫埋豹哥豹嫂加我同你，有你老竇老母睇住呢！我哋四個人行就差唔多。

定欣：你仲有冇睇TVB？有冇留意我嘅演出呀？

發哥：我有睇，你同阿田（田蕊妮）套戲（劇集《鬼同你OT》）做得好好，你兩個真係好合拍，睇晒o架我！