國際巨星周潤發再度強襲賀歲檔，並接受《東網巨星》一連五集的專訪《發哥有Say》！縱橫影壇逾40年，發哥曾與多位影帝影后合作，他心中的最佳拍檔原來是70、80年代經典螢幕女友鄭裕玲（DoDo），他笑言非常傾慕DoDo，問到有否機會再續前緣？發哥即笑指DoDo另結新歡黃子華，已將他拋諸腦後。

曾與多位影帝影后合作的發哥，最難忘螢幕女友DoDo。

發哥憶述與DoDo拍劇的一點一滴，愈講愈開心！

2010年，發哥和DoDo在記者會中碰頭，兩人一見故友即親切抱抱。

神級影帝周潤發於1973年加入無綫藝員訓練班，自此展開璀璨星途，逾40年來一直企硬一線男主角，曾演繹無數經典角色，不論是電影《英雄本色》、《監獄風雲》、《賭神》和《秋天的童話》，抑或是劇集《網中人》、《親情》及《上海灘》等，至今仍叫人津津樂道！前年起發哥再次強襲賀歲檔，連續三年都有作品推出，而且均叫好叫座，而今年主演的《賭城風雲III》，不論卡士及製作費均屬頂級，相信票房將繼續長紅，有望挑戰15億元人民幣（約17.75億港元）！

拍劇半年日日見

早前發哥到北京宣傳《賭III》，接受《東網巨星》專訪，在《發哥有Say》中繼續發揮幽默本色，上山下海無所不談，他直言多年星途幕幕難忘，很高興能與不同的導演及影星合作，造就他屢闖高峰，又笑言很難選出代表作。但論到最難忘拍檔，發哥閉目回憶一會後終有答案，究竟是《秋》片的鍾楚紅、《英》片的張國榮、《玫瑰的故事》的張曼玉、《辣手神探》的梁朝偉，還是最近兩套《賭》片的張家輝？統統非也，發哥回答是在電視圈的最佳拍檔鄭裕玲（DoDo）！

記者：發哥同過咁多明星合作，最鍾意同邊位拍檔？

發哥：如果講電影，因為拍攝時間好短，得兩、三個月，我試過《辣手神探》比較長，拍半年，多數係動作戲。但講到以前電視台，咁長時間，成半年對住同一個人呢……就係我同DoDo喇！我哋連續拍兩套劇，《親情》、《網中人》，當時我見佢仲多過見我阿媽，我一擘大眼就見到佢！當時兩套戲都係家庭戲多，佢都係做我女朋友，所以對佢嘅變化、為人，我哋相處時間長，雖然唔算好了解佢，但嗰段時間我係投入咗，愛上咗佢！所以我對DoDo非常傾慕。

記者：咁多年仲有冇Keep住聯絡？

發哥：後嚟我離開咗TVB喺出面發展，就好少見佢，係一次喺電視，佢做主持訪問，我哋先再見番面，我喺出面經歷過咁多，佢又有自己感情路線，就各有自己世界啦！

記者：仲有冇機會再合作？

發哥：佢搵到至愛啦！佢搵到黃子華喇！唔需要我喇！哈哈！

難得再見抱吓先

發哥與DoDo是70、80年代最令人印象深刻的螢幕情侶，當時兩人於《網》劇中的一幕長吻戲震撼全城，在電影《花城》中更有超激床戲，尺度令人睇到嘩嘩聲！早前DoDo曾大讚發哥充滿吸引力且演技超班，與他合作令自己更有自信！2010年，兩人在發哥主演電影《讓子彈飛》記者會中碰頭，DoDo擔任大會司儀，他們見面即親切抱抱，發哥更讚對方愈來愈年輕！

文：陳偉立北京直擊

攝：秦健輝