鄭嘉穎與女友陳凱琳昨日首次情侶檔出騷，小兩口不時甜笑對望大放閃光彈，但嘉穎卻拒絕當眾錫女友，笑言要留到結婚先錫！文：影視組

有Grace親自圍頸巾，嘉穎直頭暖到入心啦！

有情飲水飽，嘉穎同Grace望住盆栽都可以甜笑一餐，閃到呢……

嘉穎和Grace十指緊扣玩遊戲，默契十足！

嘉穎與女友陳凱琳（Grace）昨日到寶琳MCP新都城中心出席《新春百鳥桃花園》揭幕禮，是兩人拍拖以來首次情侶檔出騷，嘉穎以Shocking Pink型仔西裝襯女友的白色毛毛裙。活動上兩人不時甜蜜對望，期間被司儀慫恿「錫錫」，但嘉穎以「咁我哋返入後台預備吓先」打發，兩人之後在台上玩遊戲，並應大會要求互餵新年糖果，又手綁紅線玩十指緊扣，Grace更為嘉穎圍上長頸巾，又Warm又Sweet！

新春上門拜年

問到為何不肯錫錫時，嘉穎竟緊張得說話走音：「都唔係嗰啲！要睇場合，結婚錫就好應該。（情人節再情侶檔？）偶然一次幾得意，唔使咁密。（情侶檔酬勞80萬？）咁等我去追番啲尾數先！唔使講到咁誇張，酬勞滿意，比平時高啲啲咁啦！（當你哋新人咁玩？）又唔算！」又預告新春會向Grace父母拜年，對於被指是見家長，他說：「其實之前見過啦！Auntie同Uncle都好Nice。（你媽咪點對Grace？）不得了！會問佢鍾意飲乜湯，唔再問我！（幾時派雙封利是？）一步步嚟，一單還一單。」Grace則對鄭媽媽讚不絕口：「佢媽媽好Friendly，好好傾，同佢相處好舒服。（頭先被當新人玩？）玩新人應該好慘，但我哋好開心！（同意嘉穎唔公開錫錫嘅理由？）咁呢度係商場，今日已經好Sweet啦！」

短訊慰問王馨平

此外，對於舊愛王馨平（Linda）父親王羽急性腦出血一度命危，嘉穎說：「我尋晚知呢件事，我諗Linda依家都好忙，我Send咗Message，因為早排我有啲事搵佢幫手，諗番都唔好意思，可能煩到佢。（Linda覆你乜嘢？）都係講吓Situation ，但唔應該由我講出嚟畀大家知。（對上一次見王羽係幾時？）好耐好耐喇！」