近日被《好報》踢爆與音樂才子鄧智偉同居的咪神高海寧，貫徹「地下傳統」迴避戀事，再拖好友陳智燊及宋熙年落水，又獲拍檔李施嬅及胡蓓蔚擋駕！反觀鄧智偉獨力否認同居時大發忟憎，多次提及女方更黑面喊停：「得唔得呀啲答案？夠唔夠寫呀？OK啦！」 文：影視組

鄧智偉唔認私藏高Ling，卻愈講愈扯火，點解嘅？

馬國明（左起）大讚三位主持李施嬅、高Ling及胡蓓蔚廚藝了得！

同居的高Ling與鄧智偉被《好報》拍得易容上樓，更不時前後腳現身。

高海寧（高Ling）與林峯御用監製鄧智偉被《好報》大爆秘戀兼同居，惟二人昨日各自出席活動時繼續貫徹「地下傳統」！偕李施嬅及胡蓓蔚主持無綫新節目《為食三姊妹》的高Ling，被問到與鄧智偉的關係時即出黃牌，再拖住同一屋苑的好友陳智燊及宋熙年「伉儷」落水：「有時陳生唔得閒，準陳太好悶，咪陪佢Shopping、做運動。」提到泊月租車位時，她解釋兩位好友都有車位：「佢哋其中一個唔喺度，我咪可以泊囉！」

李施嬅胡蓓蔚擋駕

提到拍攝場地在鄧智偉出席活動的附近，高Ling稱毫不知情，李施嬅即擋駕說：「鄧生可能同我哋有緣啲，因為我哋『胡說八道會』要唱歌。」胡蓓蔚又將話題扯到《為》的主題曲，李施嬅亦建議找鄧智偉與單立文一齊作曲，問到是否高Ling主唱？胡蓓蔚笑說：「三個一齊唱。」

見面會尷尬?見到先啦!

另一邊廂，鄧智偉於活動受訪時話題離不開高Ling，雖然他最初多謝記者轉告與高Ling範圍近，要多留在大堂及停車場，又大讚高Ling是女神人見人愛，惟講到兩人出入同一座兼同一層單位時，本來輕鬆的他即煞有介事說：「點會呀？都話Lobby同停車場咯！（怕唔怕畀人撞見同一層樓出現？）點會？咁唔得嘅，唔可以咁樣。」再被追問是否送玫瑰花賀高Ling生日時，他即忟憎地說：「咩呀？我探病，咁啱啫。」問到兩人傳緋聞後見面可會尷尬？他即黑面說：「見到先啦！得唔得呀啲答案？夠唔夠寫呀？OK啦！」