昨日天氣嚴寒低至3.1度，吳業坤（坤坤）與黃翠如、譚嘉儀出席活動時盡顯孱弱一面，全程羽絨不離身，與穿上中袖短裙的翠如相映成趣，坤坤又因翠如與母親似樣而封對方為「母神」！採：音樂組　文：專案組　攝：林蔚恩

吳業坤戴冷帽及穿羽絨，與穿上中袖短裙露長腿的黃翠如相映成趣。

黃翠如（左起）、新鴻基地產代理有限公司租務部總經理鍾秀蓮、吳業坤及譚嘉儀，齊齊出席《Mikiki x寵物小精靈Pika新年祭》活動。

歌手吳業坤昨日與黃翠如及譚嘉儀在新蒲崗Mikiki出席《Mikiki x寵物小精靈Pika新年祭》迎春祭典活動，近日寒流襲港，昨日市區氣溫更低見攝氏3.1度，只見怕凍的坤坤相當錫身，全身包到冚，戴上冷帽之餘更全程羽絨不離身，相反翠如身穿中袖薄短裙大騷長腿，無懼寒風！活動上，新鴻基地產代理有限公司租務部總經理鍾秀蓮與三人一同主持亮燈儀式，並向他們致送紀念品。

同阿媽激似樣

期間三人與粉絲大玩遊戲，並要玩到身貼身，不過坤坤依然企硬堅持不肯除褸，又笑言怕凍。玩完遊戲後，坤坤即場唱出比卡超主題曲，身旁還有四隻比卡超伴舞，令全場氣氛瞬間高漲！他其後受訪時熱到不停抹汗，不過仍堅持死守其羽絨，提到他在台上封翠如為「母神」，因對方是有母親Feel的女神：「佢似我阿媽，之前喺網上Post咗我同媽咪嘅合照，網友話我媽同翠如好似樣，不過翠如話佢表妹仲似我媽。（你哋係唔係有親戚關係？）可能我哋嘅祖先有少少關係。」坤坤近日爆紅，要多得翠如當日向唱片公司推薦他，昨日二人難得一同出席活動，坤坤直言對方是恩人：「係佢介紹畀我依家間唱片公司，缺少咗佢就可能冇依家呢一刻，今次都算係第一次同佢出席活動做嘢，好開心。」

想上山睇結霜

而翠如受訪時透露，原本提議大家齊齊着羽絨上台，但反應麻麻，怎料坤坤卻「信守承諾」以羽絨現身，翠如笑指他冇義氣，幸而天氣沒有想像中凍。她又表示前晚與女友人到了尖東海傍：「原來好多人去嗰度Feel吓有幾凍。我住郊區，今朝想上山睇吓有冇結霜，點知瞓醒見到新聞已經話結咗霜，如果天氣一直咁持續落去，我會想睇。」提到她早前去日本旅行，問她日本還是香港更凍，她說：「香港凍得嚟仍可以走出街，不過都希望大家揸車小心，我見過有啲小貓匿喺車轆度取暖。」