最近在處境劇《愛．回家2》搶鏡的精靈B女「馬家好」，原來是劇中演員徐榮的女兒徐心怡，眼仔睩睩的她地位崇高，無論監製、導演或「大Sir」劉丹等前輩，都要敬她三分！

包包眼仔睩睩兼表情多多，難怪徐榮和「馬家」上下都錫到佢燶！

受訪期間，徐榮經常忍唔住錫啖包包，Sweet到呢！

徐榮以毛公仔收服包包個心。

處境劇《愛．回家2》近日安排「馬家」回歸，馬子仁（羅天宇飾）與老婆Pinky（阮兒飾）誕下B女「馬家好」，而其真實身份原來是劇中演員徐榮的親生囡囡徐心怡（乳名：包包）。

劉丹錫錫前刷牙

只有三個月大、「出道」不夠一個月的包包，在劇組擁有至高無上的地位，徐榮笑指監製羅鎮岳為邀請包包演出，曾向他保證：「每次返工唔超過三個鐘，每星期唔超過一次。如果我應承，佢會同導演、編劇、PA所有人夾，叫導演一定要拍包包嘅戲先，編劇編少啲包包嘅戲份，叫編Rundown嘅同事編到包包唔使等，拍戲時可以一次過拍晒。」

對於「包巨星」降臨劇組，似乎所有演員都相當配合，徐榮說：「一有『家好』嘅場口，全部都係一Take過！大家仲會喺拍戲前消毒隻手，有場戲劉丹要錫錫『家好』，佢特登事先去刷牙！」問到「包巨星」處女演出獲得甚麼酬勞？徐榮說：「佢當『特約演員』咁，每出場一次計一次錢。不過最重要都係有紀錄價值，可以同爸爸一齊拍劇！」

長Roll機拍喊戲

為了令包包拍攝時更投入，徐榮更會隨身帶備兩大法寶—「獅子仔」和「麵包超人」毛公仔，包包一望到就會零舍聽話！而導演幫包包拍喊戲時也別有辦法，徐榮說：「冇包包戲份時，導演就會將個鏡頭對住佢，一直等，捕捉佢喊嘅一刻，之後再拎嚟用，笑戲都係咁拍。」

文：專案組　

攝：嚴偉國