近期人氣爆燈的吳業坤自爆破財。原來前晚出席仁濟醫院慈善活動前發生交通意外，「戇男」上身的他竟未有與肇事司機報警備案，還傻更更說：「我畀佢開齋添！」

吳業坤自爆前往活動途中發生交通意外，車身被揩花的他依然笑笑口。

許廷鏗曾參與各種慈善活動，可見善心爆棚。

李司棋出席慈善活動，實行身體力行。

吳業坤偕許廷鏗（Alfred）及李司棋前晚出席慈善活動時，自爆駕車前來途中發生「小意外」：「頭先發生咗交通意外，畀人Cut線，個人冇撞親，但架車撞親揩花咗少少，見到大家（坤坤同肇事司機）都好似戇居居咁，所以就算數，當破財擋災。」問到肇事司機可認出他？坤坤說：「見佢都愕一愕然！（咁究竟邊個唔啱？）應該我冇錯，我係小心嘅駕駛者。」問到當時是否小路出大路？坤坤解釋：「係兩條平排行車線，我有問佢點算，佢都話唔知。（冇賠錢？）冇呀！我趕時間嚟呢度，所以走先。（冇報警？）大家都話走，不過都係第一次撞車。（你有幾耐車齡？）3年，所以今次畀佢開齋！」另外，問到可有跟肇事司機私下簽和解協議書以保障雙方權益？坤坤昨日受訪時說：「冇，我唔知要咁做。」

坤坤出口成「聞」

同場的Alfred大讚坤坤厲害，出自他口中便成「新聞」：「好勁喎！講乜都係料喎！」又慶幸意外未發生過在他身上：「道路零意外，香港人人愛。」談到做慈善活動，他表示曾與Fans一同賣旗及獎券，坤坤則說：「趁有少少知名度想宣揚訊息，都想身體力行，想做多啲環保工作。」

文：音樂組　

攝：鄭家俊