美國殿堂樂隊The Eagles的主音兼結他手Glenn Frey病逝，不少香港歌手大表惋惜，「歌神」許冠傑（阿Sam）亦深感難過：「知道佢逝世嘅消息，唔舒服，我曾經翻唱佢哋嘅經典作《Hotel California》，好難忘，我亦都唱好多佢哋啲歌，大家又鍾意彈結他，對佢嘅離開覺得遺憾同懷念，希望再唱佢呢首《Hotel California》向佢致敬。」

同樣玩Band出身的太極樂隊主音雷有輝說：「嘩！呢個真係我嘅偶像，我細細個聽The Eagles，都係因為聽The Eagles先夾到咁多唱歌嘅部分，啲和音，或者甚至乎我哋夾《Hotel California》，都係因為The Eagles。Glenn Frey係The Eagles嘅靈魂人物，佢寫啲歌好聽，把聲又好聽，就算佢做咗Solo時，佢首《The One you love》都膾炙人口，梗係可惜，一個陪着我大嘅音樂人，亦啟發我好多關於音樂，或者和音方面嘅編排路線嘅老師嚟嘅，Rest in peace,Glenn Frey,i love you ,i miss you。」

太極樂隊的結他手鄧建明（Joey）得悉Glenn 病逝，非常不開心：「佢係我最愛嘅樂隊，喺我中學年代已經玩佢嘅歌，係我哋細個嘅教科書嚟。」他表示有儲齊The Eagles的所有專輯，更有幸看到他們合體個唱：「1997年我喺倫敦錄大碟，佢哋第一次原裝陣容復合演出，我特登一個人過去溫布萊睇，八萬人點起打火機嗰刻仲記得。」Joey指兒時因科技未發達，所以只能聽CD，至後來才慢慢從電腦上看他們Live的演出，故那次親身觀看極震撼：「我亂打亂撞，得自己一個都要去，因為機會難得，之後已經唔齊人。」Joey認為Glenn甚至The Eagles都影響無數人，問到會否寫歌紀念這傳奇人物？他說：「好提議，我哋太極依家做緊新歌，可以諗諗。」