《第21屆Critics' Choice頒獎禮》前日舉行，電影《末日先鋒：戰甲飛車》威爆掃9獎成大贏家，史泰龍則繼金球獎後再下一城奪最佳男配角，第一時間多謝黑人導演及拍檔，補番《金球獎》時忘記致謝隻鑊！

史泰龍得獎可謂實至名歸，獲全場起立拍掌！

Jacob發表得獎感言，不過企上台都唔夠高，要出動人肉咪Stand。

基斯頓奪得喜劇組影帝，開心到高舉獎座。

Amy蝦碌爛鞋，索性脫下高踭鞋致詞，夠晒豪邁！

Riley及Rosie率《末》片演員代領獎。

Alicia憑《丹麥女孩》奪得最佳女配角。

頒獎禮前日於美國聖莫尼卡舉行，獎項由北美重要影評家及電影記者選出，甚有權威，今屆由佐治米拿（George Miller）執導的《末日先鋒：戰甲飛車》（Mad Max：Fury Road）威爆掃盡9個獎項，包括最佳導演及最佳動作片男女演員獎成大贏家，可惜失落最佳電影獎，不過《末》片眾星未有現身拎獎，最後由有份參演的名模Rosie Huntington-Whiteley及Riley Keough 等代領。

影帝后失蹤

至於劇情組影帝影后賽果完全為金球翻版，「里奧仔」里奧勒度狄卡比奧（Leonardo DiCaprio）及貝兒娜森（Brie Larson）再膺帝后，連中兩元成奧斯卡帝后大熱，惜二人未見影，里奧仔僅拍短片致謝。

大獎贏家冇影，頒獎禮仍有史泰龍（Sylvester Stallone）擔大旗搞氣氛，憑《Creed》洛奇一角封最佳男配角的他抽水自嘲於金球獎忘記感謝導演與拍檔而惹起風波：「喺我搞出更多麻煩前，我要先多謝導演Ryan Coogler，佢真係個天才，仲有Michael B. Jordan，你好偉大又有天分！」最佳女配角由《丹麥女孩》（The Danish Girl）的Alicia Vikander奪得。

攞獎唔夠高

勇奪最年輕演員獎的《抖室》（Room）9歲男星Jacob Tremblay人仔細細，領獎時企上「增高台」都未夠高，要由頒獎男星幫手遞咪，場面溫馨，Jacob拎住獎座賣萌說：「好型呀！今日係我人生最好嘅一日！」又稱會將獎座放於家中的「千歲鷹號」模型旁邊，令台下笑唔停！

此外，基斯頓比爾（Christian Bale）憑《沽注一擲》（The Big Short）獲喜劇組影帝時即場咀爆導演Adam McKay，《姐姐愛最大》（Trainwreck）女星Amy Schumer封后時亦興奮咀男友，但上台時高踭鞋突然爛掉，要即場脫鞋，場面搞笑！

電視方面，姬絲汀鄧絲（Kirsten Dunst）憑《雪花高》（Fargo）封「迷你劇／電視電影組視后」，同劇Jesse Plemons贏得最佳男配角殊榮！

文：外娛組　

圖：美聯社、法新社