何浩文（Dominic）、文凱玲、唐紫睿及鍾采羲（Iris）前晚現身銅鑼灣，為《鴨王2》謝票。事後Dominic與文凱玲孖住做訪問，異口同聲表示知道戲中結尾的性虐場面及笑位成為影迷口中的亮點：「導演拍得太真實喇！血腥加暴力，Iris最終仲死埋添！」

文凱玲（左起）、何浩文、鍾采羲及唐紫睿谷戲，額頭受傷的鍾采羲更負傷上陣！

何浩文一拖三到戲院為《鴨王2》謝票。

Dominic認為今次較上集更具故事性，問到首映後有否問「未來女友」意見？他說：「呢幾日我好忙，未問佢呀！不過我老竇完場就同我講：『睇你下部做啲乜！』似乎畀緊壓力我，叫我拍第二啲嘢。我唔敢諗父母睇到我嘅床戲有咩反應，上集我老竇竟然帶咗我阿婆去睇早場，睇完後阿婆同我講：『知你辛苦嘞！』」而Iris則被發現額頭有傷，她開玩笑說：「屋企發生家暴呀！講笑啫，我冇戴眼鏡，所以跣低咗，好彩用手卸咗啲力，獨居老人真係要小心啲！」