Shine新年谷桃花派孖寶利是

組合Shine、歌手吳若希（Jinny）與黎美言（Winkie）昨日到大埔新達廣場出席《新達廣場 X 大耳查布遊歷桃花園》活動，並主持揭幕活動，而張啟樂（Ben）和Kawaii則擔任大會司儀。活動期間，Shine、Jinny及Winkie都分別親自挑選現場粉絲上台大玩鬥快封利是，作近距離接觸，而Jinny及Winkie即場大獻歌喉。Winkie一見到人扮的猴子即大發童心，不時跟猴子拖手。

有計劃生B

Shine受訪時談到已為人夫的徐天佑是否需要預備足夠現金派利是，天佑說：「要呀！以往派一封，依家要派兩封，試吓新嘅感覺囉！（生番個小朋友收番啲？）趕唔切，下年囉！今年都好忙，未必係今年嘅事，有Plan嘅，都想！」而黃又南在台上透露每年都有買桃花，但不知道要圍着桃花走三圈，並說：「今年會行，年年原來有桃花擺屋企但係冇行，蠢咗添！係咪都試咗先。（想搵到真桃花？）冇話想唔想，順其自然。」

演歌舞劇有挑戰性

此外，兩人透露下月底將會與另外三位專業舞台劇演員排練歌舞劇。天佑表示有很多人都問Shine會否舉行演唱會，他指其實都有想過，不過他倆都希望能夠舉行歌舞劇：「今次就有歌舞元素，主要就係Drama。（加入自己嘅音樂元素？）會呀！依家都同導演傾緊，可能會寫啲歌畀佢。」又南則指今次是第二次參與舞台劇，不過因為需要跳舞，所以甚具挑戰性：「跳舞係自己嘅弱項，我諗都會擺好多時間落跳舞上面，出到嚟好睇，唔係跳晒個Step就算，出到嚟係要真係似一個跳舞嘅人。」問到可會Keep Fit時，他倆笑言過完農曆新年都會肥幾磅，所以一定要Keep Fit。