阿倫霍建寧醉酒Jam歌

阿倫日前在Facebook上載四條短片，片段中見他在有「打工皇帝」之稱的霍建寧大宅歎美酒夾Band唱歌，同場還有李克勤、彭健新，片段中可見霍建寧的大宅掛滿多幅名畫，包括已故披頭四的約翰連儂（John Lennon）畫像，還有全套專業的音響設備，隱約還看見落地大玻璃外的私家泳池。

又忘記歌詞

飲到面紅紅的阿倫親自操刀，邊拍片邊唱歌，阿倫說：「今日去咗個朋友屋企，佢好鍾意唱歌，擺隊Band喺屋企，慶祝佢嘅好日子。」鏡頭隨即影住霍建寧手執紅酒邊投入地高唱克勤的金曲《月半小夜曲》，克勤在旁和唱，霍建寧唱到七情上面，之後阿倫也高聲合唱，更豎起手指公大讚霍建寧唱得好。當晚恍如開騷般熱鬧，一齊Jam一齊唱，其後霍建寧更擔任鍵琴手為阿倫彈奏《一生中最愛》，健仔則彈結他，最搞笑是阿倫唱到中途突然忘記歌詞，克勤立即補上接住唱。之後他們又唱《雨夜的浪漫》，克勤指住名畫笑說：「好有味道。」

讚彈得唱得

昨日健仔透露當晚是即興，當年是「殼王」陳國強介紹他們認識霍建寧，大家相識十多年：「我同佢都好熟，霍生好熱愛音樂，佢志願做Band仔、佢鋼琴同結他都耍家，嗰度係佢書房。（嗰日霍建寧生日？）唔知喎！現場冇唱生日歌，我哋經常有聚會。（溫拿2月開演唱會可會請霍建寧做嘉賓？）佢唱得咁好，唔好喇啩！」