顏子菲做楊紫瓊第二劍指Hollywood

現年29歲的顏子菲去年離開亞視後，報讀黃秋生與甄詠蓓合辦的戲劇班，專心磨練演技為其「電影夢」鋪路，除了客串電影《12金鴨》、《驚天破》外，最近她更有幸夥拍型男吳彥祖（Daniel）和張孝全等參演林嶺東執導電影《天火》，子菲笑稱：「雖然我嘅戲份唔多，但同咁多位電影界猛人合作感覺好奇妙，貼錢都去啦！」

不過，子菲大嘆今次未有動作戲份，年初為法國動作片《Lady Bloodfight》健身、練武的她，雖然自稱是「容易受傷的女人」，但也很期待親身上陣拍動作片。從加拿大返港操流利英語的子菲，更視楊紫瓊、Maggie Q為目標，盼將來以一拳一腳打入荷里活，她說：「之前拍打戲做Training，我成身瘀晒、冇忽好肉，我知做打女係好辛苦，但希望不久將來自己都可以好似紫瓊、Maggie Q咁，成為一個亞洲女星，又可以參演功夫打戲。依家日日都做運動、Keep Fit，希望以最佳狀態隨時準備好拍戲。」

提到本來30A的子菲抽脂豐胸變33C，她坦承「升Cup」後工作接踵而來，那麼會否擔心「胸大」成阻礙？她笑說：「唔怕，之前練習嗰陣，有個女同學一下唔覺意打咗落我個胸度，我心諗好在（個胸）係真嘅，其實都唔會好辛苦，我依然都係好靈活。」近年不少女星以性感博上位，問到是否接受全裸演出？她說：「可能我怕醜，我唔係話向性感演出Say No，喺多倫多長大嘅時候，睇好多西方電影，好似安妮希芙威（Anne Hathaway）、妮歌潔曼（Nicole Kidman）等，全部一線荷里活巨星都曾經喺電影中出現過好性感或裸露嘅鏡頭，我覺得呢種性感係好靚嘅嘢，而西方社會同觀眾接受程度係高過亞洲好多，今時今日，冇人會用艷星或脫星標籤呢幾位女演員，但喺亞洲嘅情況唔同，所以傾角色尺度時要非常小心。」

獲斟露點拍同志片

子菲笑稱三點盡露的角色乃百年難得一遇，又直言曾獲邀於同志片露點演出：「其實睇劇情需唔需要，呢啲社會題材嘅電影，尤其同性戀，我接受，但都要同公司傾吓，同埋睇吓有冇需要去到咁盡。（李安執導電影《色，戒》中，湯唯所演的角色會接受？）如果係湯唯嘅角色，相信冇人會Say No，淨係導演兩個字（李安）已經唔使講，因為拍攝前你唔知會係點，而王家衛、李安係唔會走太偏，淨係導演個名已經值得信任。」

因此是否願意拍攝裸露的戲份，子菲稱最大因素要視乎導演和對手，又盼於演戲方面爭取更多機會，將在戲劇導師身上領略的技巧實踐出來：「當然遇到好爆、好重要或好有發揮嘅角色就更好，但依家希望有多啲演出機會畀我磨練自己。」

合作新戲嗒吳彥祖糖

身高5呎9吋的子菲直言身材高挑有礙拍戲：「通常女主角最高165到170cm，有好多選擇襯唔同嘅男主角，如果我拍文藝片係有一定難度，但我可以做打女，行出嚟好有性格、好有型、又有拳腳功夫，可以別具一格，將人哋覺得嘅阻礙變成自己嘅優勢。」

而首次與吳彥祖合作的她見到「男神」即嗒晒糖，她興奮地說：「佢真係非常靚仔，雖然佢算係偏瘦，但喺人群入面都可以一眼見到佢，真係『羨慕嫉妒』，點解佢可以生得咁靚？我作為女人都好羨慕佢。」子菲又大讚林導製作一絲不苟：「導演要求好高，佢好追求完美，有時我哋開通頂，本來夜戲拍到天光，佢覺得可以拍得更好或者仲未拍晒，就會用黑布封晒啲窗，拍到佢心目中嘅要求先收工；即使我走位差少少，佢都好敏銳捕捉到，佢真係好仔細。」

積極面試 磨練演技

離開亞視後，敬業樂業的顏子菲不斷自我增值，更積極向行內人「索料」去面試，希望爭取機會拍劇、拍電影，自知欠缺演戲經驗的她說：「過去幾年喺亞視嘅幕前演出都係以主持偏多，我想喺演戲方面磨練吓，有機會喺幕前有任何演出都已經好開心。」身為2008年亞姐亞軍的子菲，為踩入戲劇界不惜由低做起，相信她的努力終會打動圈內人士。

髮型：Van Chan BruneBlonde

服裝：Benita Fashion

場地：唐宮小聚