陳昭昭玉石奇緣

因一次的機緣下，令陳昭昭開始接觸玉，更慢慢愛上中國文化，她透露旅行見到有特色的古董飾物或者一些玉器，都會購入收藏和自用。對於眼前的收藏品，昭昭表示數量並不多：「依家唔係收藏咗好多古董裝飾品，只有約廿件，關於古董，我鍾意收藏飾物。之前喺賣物會上幫咗黃博士（黃黼嘉），佢送咗個胭脂盒畀我當禮物。其實古董我特別鍾意收藏女仔嘢，因為貪靚，仲可以用得番。」

最貴胭脂盒

眼見每件飾物都如此精緻，問到價值多少？昭昭說：「唔係好貴，幾十萬左右，但有啲好平，我由幾百蚊開始儲，幾千蚊都有。依家最貴係黃博士送嘅胭脂盒，價值廿萬，一個頂十個呀！」至於當中最為喜愛的收藏，她表示乃朋友太嫲的髮簪：「依家啲收藏品我都會用錦盒放住，等得閒攞出嚟抹吓欣賞吓。」談到踏上這條收藏之路，昭昭笑言有段古：「結緣係我有一塊阿嫲留畀我嘅玉，我唔知真假，紅色嘅，以為好值錢，攞咗去一間珠寶店，嗰度嘅鄭生鄭太好鍾意收藏玉，當時我想套現，因為嗰陣係我人生低潮，初頭創業啱啱失敗咗，跟住幕前又唔多Job。」

肉眼辨真偽

昭昭坦言鄭生鄭太是她入行的貴人：「佢哋好客氣咁同我講，我塊玉係入色唔係真，但佢哋知我需要呢筆錢，所以都借畀我。（幾多？）十萬左右，喺四年前，我嗰陣唔識珠寶、玉嗰啲。我受咗對方恩惠，我就話不如幫你做嘢，咁就喺鄭生間珠寶公司做咗四個月，佢整個網站嘅資料都係我幫佢寫，例如寫咩係軟玉、咩係硬玉、點解啲人會咁鍾意啲玉呢？我之前冇打過工，呢份係第一份工。」

對於分辨玉的真假，現時對於昭昭來說已是駕輕就熟：「成日對住，用肉眼大概都會睇到8、9成，真正嘅會有靈氣，而冇入色係A玉，有入色就係B玉，再入咗樹脂膠就係C玉。其實香港係有鑑定中心，大家唔使信我，信張證書啦！」

買假貨呻笨

在玉器的世界裏，最常見的莫過於玉佛、玉觀音等，對於身為基督徒又是神學生的昭昭來說，會否存在衝突？昭昭解釋：「上帝應該係無處不在，唔應該有框框，如果定一樣嘢係咪偶像或者拜偶像，其實戴住十字架都係拜偶像，因為上帝唔係喺個十字架度，係喺我哋心入面，無論十字架、佛公、觀音，對我嚟講只係一個模型。（會唔會避免入呢啲貨？）唔會特別去入，但做生意嚟講，我舖頭一定會有呢啲貨，但喺我眼中都係瓷器公仔。」經驗老到，但仍然會有失手的時候，昭昭自爆曾經入過假貨：「見貨平會入，幾千蚊一隻玉鐲，諗住賣，入咗幾萬蚊，但之後發現係B+C貨，好激氣。佢哋唔肯退貨，不過我點都放低番啲貨，等佢內疚吓。」

儲定BB玉鈪留畀仔女

雖然昭昭仍是單身，但身邊不乏追求者出現，至於會否將收藏品留給下一代，昭昭則說：「會儲BB玉鈪留畀下一代，見到BB鈪，靚嘅會留番，但唔知第時生仔定生女，哈哈！女仔畀紫色，男仔畀綠色。」