娛樂圈新人輩出,不少人為突圍都會選擇用性感走捷徑,但亦有人堅拒靠剝上位,希望憑實力闖出一條血路!最近在JW(王灝兒)歌曲《矛盾一生》MV中,楊偲泳(Renci)以一張青澀又帶點陌生的面孔俘虜不少宅男心,年紀輕輕的她更決意以張曼玉為目標:「短期定終身,我都係想做一個演員!」

楊偲泳展露青澀笑容,自然得來又夠可愛,唔行性感路線一樣有市場!

拍攝期間楊偲泳表情多多,果然係愛演之人!

性感總能吸引眼球,不過要從一片「性感海」中突圍而出亦非易事,所以楊偲泳從一出道就不想被標籤為性感,希望用另一種實力取悅觀眾。22歲的她帶着一股傻勁勇闖演藝圈,身為90後的她以周迅和張曼玉為目標:「我本身好鍾意演戲,所以有時候一得閒就會睇戲,係不斷重複咁睇同一套戲,例如周星馳同張家輝,我最鍾意嘅始終係周迅同張曼玉,因為覺得佢哋真係好吸引!」

銀幕發放正能量

談到短期目標,Renci說:「我希望可以盡快喺大銀幕裏面演戲畀大家睇,呢個亦係我嘅終身目標!我係一種鍾意發放正能量嘅人,所以我好想有一部電影,大部分人睇完之後會有一刻覺得,或者我哋係一個可以發夢嘅人,或者香港係一個可以發夢嘅地方,我想有一個強少少嘅感染力。」

夢想係……餵鯊魚

作為一個不折不扣的「文青」,Renci的夢想除了是到南非餵大白鯊外,睇戲亦會揀海洋紀錄片及太空電影,平日亦熱愛旅遊,談到最喜愛的地方,她說:「台北!我好鍾意台北呢個地方,我覺得呢個地方好慢活,嗰度嘅人好識享受生活,畀人一種好輕鬆嘅感覺,就算佢哋有工作在身,好似行入去咖啡店,或者一啲銷售嘅舖頭,佢哋都唔會介意你到底買唔買,或者你到底要坐幾耐。其實我已經去過好多次台北,但係每一次都覺得好舒服,放心啦台北,我好快會再嚟o架喇!」

場地:GrowthRing & Supply

文:張雯雯 

攝:鄭家俊