唱跳組合天堂鳥（BOP）近日推出新碟，回顧2015年，他們異口同聲認為廣州的歌唱比賽最難忘，Lincoln更試過慘被觀眾兜拳打心口！曾被指介入林欣彤戀情的Gordon則盼新一年能讓時間證明他為人。

Lincoln登台硬食一拳又變透明人，認真無辜辜！

Tyrese認為新碟能夠總結過去一年，讓港迷看到他們努力的成果。

Gordon捲入與林欣彤的緋聞時，最擔心的是影響BOP發展！

林欣彤

出道近兩年的跳唱組合BOP（天堂鳥）繼去年《登陸太陽》後，近日衝出外太空，以宇宙銀河為主題，發行新碟《Holic》及推出主打歌《Milky way》，成員Tyrese表示在年底推出此專輯就似一張卡片，總結過去一年的努力成果：「想畀樂迷知道我哋仲喺香港樂壇，唔係無聲無氣，都算係一個交代。」

回顧2015年，三位成員均認為於廣州參加歌唱比賽的經歷最難忘，雖最終五強止步，但已於比賽中見識不少，亦增加了默契：「集集都要諗用咩歌，佢嗰邊係冇任何和音、伴唱嘅墊底聲，我哋又要跳住唱，有時真係會唔夠氣，唔出過去都唔會知道自己咁多不足，呢個比賽對我哋嚟講，真係見識咗唔少！」

Lincoln瘀爆趣事

談到內地出騷趣事時，Lincoln即爭住舉手分享：「我一定係最有趣嗰個！有次入場，突然有個觀眾兜拳打落我個肚度！但我從未見過佢，嗰陣我又驚又有啲忟，仲因為咁第一次同Gordon鬧交！不過其實好小事，只係斟酌行路定坐車，返去途中已經冇事。」未幾，Lincoln又自爆行紅地氈的瘀爆經歷：「仲有次我哋喺內地行紅地氈，有職員幫我哋開車門，但當Gordon同Tyrese都出咗去之後，佢就以為入面冇晒人，閂埋道車門，而我……咪死死氣自己開番門出囉！可以點啫？」

Gordon盼撇清緋聞

至於Gordon曾被指介入林欣彤（Mag）的戀情，他至今未能忘懷，希望新一年能讓時間證明一切：「都幾深刻，因為冇咗好多朋友，最唔開心係個個都以為我做（爆料），雖然畀我都會咁諗，但做呢件事嘅人自然知邊個做！不過我都算好彩，仲有一班好朋友撐住我，Lincoln、Tyrese佢哋都好Support我！出事嗰陣，我第一時間係驚搞衰咗天堂鳥個名！」

場地：雷橋燒肉日本料理

服裝：K-Swiss、CHEVIGNON

文：鄧倩兒