外表粗獷的演員古天祥（Carlos）之前被拍得揸電單車送藝人周家怡返香閨，繼而傳出緋聞。原來二人因電單車結緣，Carlos提起當時情況：「有次喺工作上接觸到周家怡，佢講起好鍾意電單車，未試過喺香港真正飛一次車。咁我咪畀佢感受吓，當識個朋友咁，嗰日我哋淨係約出嚟研究車，飯都冇一齊食！我哋睇完個報道都覺得幾好笑。」

古天祥喜歡哈利的復古，又可以玩到個人Style。

獨愛電單車的Carlos擁有起碼四部電單車，他覺得最型的一部就是當時帶周家怡遊車河的「杜卡迪（Ducati）」：「我鍾意玩哈利（Harley），Sport Bike我又鍾意。哈利就比較復古，可以自己Design，玩到自己Style。Sport Bike就好似跑車咁，尤其係嗰部紅色火辣辣杜卡迪我好鍾意！」原來為了電單車，他曾經歷過種種驚險時刻：「我中學時喺澳門讀書，當地好多電單車，我會靜靜雞借朋友啲電單車嚟玩，但嗰時唔係好識揸，都好危險。我又有一次喺賽車場飛車，斷咗鎖骨，到依家仲有條疤。」