「鴨王」何浩文昨日與一眾新片演員到旺角街頭谷戲，他揚言票房過千萬便會裸泳回饋觀眾，惟力邀文凱玲陪裸時慘食檸檬！至於谷力十足的林莉嫻大晒一雙「湯碗北峰」，卻不慎露出雙Pad。

林莉嫻毫不吝嗇美好身材，力谷「湯碗北峰」！

何浩文同時抱起露孖Pad的林莉嫻（左）及文凱玲！

鍾采羲（左起）、白健恩、林莉嫻、何浩文、文凱玲及唐紫睿齊齊出「蕉」宣傳《鴨王2》。

性感上陣的鍾采羲，大晒香肩及白溜肌膚。

藝人何浩文（Dominic）、文凱玲（Connie）、林莉嫻（Leslie）、鍾采羲、唐紫睿及白健恩，昨日現身旺角街頭為新片《鴨王2》宣傳造勢，為搞噱頭，Dominic及白健恩化身大力士，同時抱起兩女，只見左擁右抱的Dominic神色自若，充分表現出「鴨王」的力量及持久力。惟力谷一雙「湯碗北峰」搶焦的Leslie，被抱起時不慎走光露孖Pad，可見以雙層承托的她為宣傳谷到幾盡！

坐側邊打氣

Dominic受訪時希望《鴨王2》能突破第一集創下的八百萬票房，揚言若破千萬票房會以裸泳答謝支持：「冬天裸泳，邊度少人就去邊度啦！我會拍片放上網，但反而想知啲女仔會做咩，冇理由得我一個，男人都需要Ice-cream，搵Connie同Leslie陪我！」可惜Connie不肯應約：「我唔介意着泳衣坐喺側邊幫佢打氣！」

怕嚇親保守父母

提到片中的大膽演出，Connie直言看到感尷尬：「比我想像中誇張，有啲朋友睇完Trailer打畀我話我好勁！（邊方面勁？）好激好性感！（怕畀屋企人睇？）會呀！我同爸爸媽媽講首映咪嚟睇住，等我睇咗先，畀個心理準備佢哋。」Leslie則表示父母比較保守：「我都怕嚇親佢哋，但佢哋都知我拍嘅，有探過班。」

文：影視組