少女向來愛吃甜品，網友新寵譚淇淇及許芯悅日前專誠學藝，嘗試親手炮製甜品馬卡龍，兩位甜姐兒大鬥甜功，製成品尚算合格。她們笑認性格跟甜品一樣甜，平日會做不少窩心舉動，包括經常DIY小禮物氹身邊人！文：立影　攝：吳文聰

KiKi（左）與Katie樣子甜美，更花心思學整甜品冧身邊人，難怪成為網友的甜心啦！

深得網友寵愛的女Rapper譚淇淇（KiKi）及新進女星許芯悅（Katie）擁有甜美笑容，兩位甜姐兒日前學整馬卡龍，鬥晒「甜功」！兩人都有整甜品的經驗，在導師林妍樂（Hehe）的指導下很快上手，完成花花及熊仔圖案的馬卡龍，兩人攪勻材料的手勢頗為熟練，但擠模時即出現蝦碌，頭幾隻熊仔樣變晒形，後來才愈整愈順暢，製成品似模似樣，加上現場精緻的餐具，兩人猶如置身酒店High Tea，相當愜意！

鬥數窩心冧招

KiKi與Katie憑Sweet樣俘虜不少Fans，兩人自言性格與外形一樣Sweet爆，經常做一些窩心舉動氹身邊人開心，曾炮製甜品及DIY禮物，Katie說：「我會整小禮物畀朋友、家人、男友，多數係啲手工藝品或者蛋糕，呢啲都係Sweet嘅表現吖！而比較特別係將朋友肖像整落曲奇度。」KiKi笑說：「我都試過整好多卡、蛋糕、模型，最犀利一次係有朋友生日，我哋約佢去旺角，喺街度搵咗好多陌生人逐個送氣球畀佢，最後我哋成班朋友扮Minions突然出現，對住佢唱生日歌，的確係幾爆！」

期待浪漫男神

問到會否要求另一半也是「甜蜜男」？KiKi笑言理想男神當然愈Sweet愈好，但現實與理想往往有分別：「冇諗咁多，呢啲講緣分，好在前男友都鍾意整嘢我食，或者幫我洗頭、吹頭，呢啲簡單幸福我都好滿足！唔使好似我咁浮誇嘅，浮誇嘢等我做！」Katie則表示前男友相當木獨，情人節都只是「食Hea飯」，希望下位男友會多出浪漫冧招。