馬來西亞歌手鄧養天（Issac）「粵」級挑戰來港出碟，為了苦練廣東話，不時在港式茶餐廳打躉偷師，幸好他在港認識了不少朋友，當中包括秦沛愛女姜麗文，Issac大讚她獨立有個性，完全符合他的擇偶條件！

與緋聞「導電體」姜麗文首次合唱的Issac，拍晒心口話唔怕傳緋聞！

姜麗文

Issac（左二）早前在戶外拍攝新歌《凹凸》的MV。

Issac為了學廣東話不惜日日去茶餐廳打躉，果然勤力！

馬國歌手鄧養天近年瞄準香港作為發展基地，日前推出最新EP《潛意識》，事前最令他苦惱的是挑戰四首廣東歌，他在港定居一年期間，不時爭取時間苦練廣東話，他更大爆最愛到港式茶餐廳打躉，感受本土風情學粵語：「睇吓香港人點嗌嘢食，會傾啲咩，因為覺得喺茶餐廳係好簡單、好Local嘅生活，聽到有咩唔明嘅字就記低，返去再問同事同朋友，咁樣反而學得最快！」

錄一句個幾鐘

日子有功，廣東話的基本對話變得不是問題，但當他踏入錄音室後卻遇到難題：「唱歌原來係另一回事，好彩我有朋友喺電視台做配音，每次佢幫我用唸嘅方式，逐個字讀歌詞出嚟，我就聽番跟住嚟學。依家對我嚟講，最難都係『響』、『上』呢啲音，可能要唱十幾次先成功，一句就要錄成個幾鐘！」

合唱唔怕緋聞

在新歌《凹凸》中，Issac與姜麗文（Lesley）首次合唱，面對熱情如火的Lesley，他當堂變得「鵪鶉」：「我係一個慢熱嘅人，第一次見佢有小小緊張，因為佢好鬼妹仔性格。（鍾意呢類型？）佢有我好欣賞嘅地方，就係佢好獨立，唔需要人哋專登去照顧。」提到Lesley向來是緋聞「導電體」，問到是否擔心惹緋聞？他說：「我唔驚，可能係佢性格太Nice，好易同人Friend！」

髮型：Matt＠Xenter

化妝：Maggie Yeung

文：音樂組