英皇旗下歌手今年在各大頒獎禮合共奪得73個獎項，成績驕人，昨日容祖兒、張敬軒等出席祝捷會，期間祖兒更主動與傳不和的新城知訊台台長朱明銳祝酒、合照兼握手，成功破冰！

在四台頒獎禮擸走12個獎項的祖兒非常風騷！

祖兒主動與朱明銳握手釋前嫌。

祖兒一時失魂亂講嘢，軒仔即出言制止。

Vincy希望母親早日甦醒。

英皇昨日舉行頒獎禮祝捷會，慶祝旗下歌手在各頒獎禮上勇奪共73個獎項的佳績，除了容祖兒、張敬軒、泳兒（Vincy）、林欣彤、洪卓立、羅力威、鍾舒漫、馮允謙及陳凱彤外，去年因祖兒沒有出席新城頒獎禮疑嬲到舉中指捽鼻的新城知訊台台長朱明銳亦有現身，期間祖兒識做地向朱明銳打招呼兼互相祝酒，拍照時祖兒更主動提議合照兼握手，成功破冰！

休息數日赴韓拍MV

祖兒開心表示不覺尷尬，並澄清與朱明銳沒有芥蒂：「根本冇事，都想了解佢係咪退休，會祝福佢。（銳哥話退休同當日「豎中指」有關？）唔會啦！我哋成年人唔會將咁小事放喺心，佢咁多年對我嘅好唔會忘記，佢係大情大性嘅人，嗰下都係心急啫！」祖兒透露即使頒獎禮結束亦沒有大假，休息幾天便要到韓國拍MV。

由於祖兒和軒仔一同受訪，記者問到可會與男友慶祝時，祖兒以為是問軒仔，故一直望住對方，知道會錯意後即大笑：「我仲以為你哋咁大膽問呢個問題！」曾與同性密友關智斌傳緋聞的軒仔即叫祖兒小心說話，場面搞笑！而對於舊老闆陳少寶亦被新城裁走，軒仔表示無論如何都會支持對方。

泳兒母親仍未甦醒

另外，談到母親早前爆血管入院，Vincy透露母親仍未甦醒，但身體狀況有進步，面色亦紅潤不少，問到男友可會擔心？她說：「都有嘅，佢有陪我睇媽咪，慶幸有人倚靠。（諗過結婚沖喜？）冇呀，如果要做呢件事，都會等媽咪醒番，畀佢親眼睇到我出嫁先。」

文：音樂組　

攝：鄭家俊