Twins前晚舉行尾場演唱會，期間蔡卓妍（阿Sa）獲疑似新歡的神秘男送99支玫瑰，即場冧爆！而High爆的容祖兒醉醉哋上台，又笑又喊又跪地，場面搞笑又感人！

阿Sa獲神秘男送上99支玫瑰，實冧啦！

飲了點酒上台的祖兒，攬實阿嬌感動落淚，又唱到跪地，情緒超High。

阿Sa於演唱會換上多個搶眼造型。

林峯與女友吳千語及祖兒拉晒手幅支持Twins。

楊政龍（左起）與何超蓮結伴睇騷捧Twins場。

組合Twins前晚假紅館舉行一連五場《TWINS#LOL#LIVE IN HK》演唱會尾場，獲英皇集團主席楊受成夫婦捧場外，不少圈中好友亦有支持，包括容祖兒、李克勤與太太盧淑儀、林峯與女友吳千語、周麗淇、關智斌（Kenny）、鄭希怡及黃偉文等，祖兒除了High到幾乎企足全晚睇騷外，期間更感動落淚。而日前到海南島出席李蘊婚禮的何超蓮，自甩拖後緋聞傳不停，前晚她便與楊受成細仔楊政龍孖住坐第一行睇騷，對方更幫手影相，大獻殷勤。

全場「重返16歲」

當晚Twins跳唱多首經典金曲，唱《愛情當入樽》期間，鍾欣潼（阿嬌）被舞蹈員捧起做倒轉動作，但對方疑似跣手，幸只是撞甩阿嬌的帽，有驚無險。Encore時蔡卓妍（阿Sa）感性向歌迷說：「如果有一日有人問你哋偶像係邊個，希望你哋可以好Proud of咁講係Twins！」期間坐在VIP席、楊生身旁位置、年約40出頭的西裝男深情地拿着99支玫瑰走到台前送給阿Sa，令她當堂冧爆！之後她將花轉交坐在頭排的Kenny保管。而現場不少歌迷高舉寫上「一世都係Twins」的手幅，令阿Sa大呼感動。

到點唱環節時，Twins邀請祖兒上台，「龍虎豹」三人合體，看見祖兒High爆兼面紅紅，阿Sa忍不住笑問：「你係咪飲咗酒？」祖兒自稱：「我冇飲！我要代表全場多謝你哋，將我哋拉番去16歲，有一刻我不停喊，我哋算係一齊經歷順境逆境，見到咁多人錫你哋好開心！」語畢再爆喊，直至昨日她於活動上才承認前晚曾飲酒。於演唱會期間，祖兒提議合唱《你講你愛我》，並捉Kenny上台用手機拍片進行網上直播，祖兒更High爆邊唱邊扭籮跳舞，然後三人合唱《眼紅紅》，唱到歌詞「然而我愈說愈激動」，祖兒竟激動得緊握拳頭跪地；最後演唱會在凌晨12時15分作結。

送花男與Sa媽吹水

慶功宴上，Twins受訪講到「送花男」疑似新歡，阿Sa甜笑澄清對方只是歌迷，強調現時仍是單身：「依家幾好，事業為重，幾享受現時生活，多謝關心！」而該「送花男」亦有現身慶功宴，期間楊受成、Sa媽及經理人霍汶希（Mani）先後跟他談天，Mani表示他是楊受成的美國朋友，因是Twins粉絲故來捧場。另外，昨晚阿Sa在微博上載跟媽媽合照，表示會放假數天，齊齊去玩。

文：音樂組　

攝：黎志輝