「機會係留畀有準備嘅人。」前亞姐筱靖去年12月與亞視完約，繼而開創自家咖啡品牌，逐步轉營生意，但她坦言不會放棄演藝事業，偶爾也會接拍電影或主持活動。她笑指演藝是興趣，只要不與經營生意的時間相撞，基本上都會接。文：名人組

身為家中獨女，筱靖唔多唔少有千金小姐的倔強脾氣，飯局？唔鍾意喎！

筱靖自爆片約劇約不斷，可惜現在分身不暇。

約滿亞視後，筱靖專心經營咖啡品牌生意，演藝事業則成為興趣。

美食當前，難得筱靖忍到口，專揀健康的素食。

筱靖2007年參選亞姐，往後7年一直在亞視發展，惜曝光率不多。

筱靖曾返內地行時裝騷，不過她自認「麻煩」，唔係咩Job都接！

筱靖受訪時憶述當初出席的恐怖飯局，飲到第日起唔到身！

筱靖因參選亞姐而入行，在7年的亞視生涯中，曝光率並不算多，原來是她揀工作：「我自己好有一套，好固執，好似我食齋咁，飲食節目都會推，因為我唔可以下下都要我個Partner幫我食，性格上我會堅持。而且我又好驚玩嗰啲活動（機動遊戲），因為我有畏高。」用「麻煩」二字來形容自己，筱靖絕不否認。

嘆遲來的片約

離開亞視後，筱靖收到四方八面的工作電話，有邀請她拍劇拍電影，更有些有意簽她作旗下藝人，面對數之不盡的機會，筱靖卻慨嘆：「點解我從前好有心喺呢一行發展，你哋又唔搵我呢？我依家做自家咖啡品牌，成日都要飛來飛去，好少長時間留喺香港，之前杜Sir（杜琪峯）有電影搵我拍，但因為要固定時間連續留喺香港三個星期，我時間唔得，所以推咗。」雖然可惜，但她亦非常感激亞視當初的培育。

作為家中獨女，筱靖可說是比較任性、我行我素，所以她一開始參選亞姐時，父母並沒有反對，她說：「我阿媽成日形容我係一個三尖八角嘅玻璃，見我咁任性，佢就話：『屋企人又教唔到你啦！你就出去畀人教！』我深深體會到你要喺呢個社會佔一席位，除咗你係大老細啦！但我相信大老細都要求人，我阿媽覺得我要出去浸吓先。」

筱靖把娛樂圈形容為一個「大染缸」，潛規則更是令不少人對入行為之卻步，在亞視工作期間，她曾被邀請出席飯局，但一向敢言、愛抱打不平的筱靖絕不就範：「當時我哋前老闆好多招待活動或Party，唔需要在乎你願唔願意，只要你係一個合約藝人就需要，同埋佢哋覺得呢個係一個工作。我自己好少少，因為我選亞姐嘅時候冇Title，佢哋會揀啲有Title嘅女仔。對於食飯一系列，我後期先推，我前期都有去，我都有嬲過，都有喊過，我同Daddy講，點解要去做呢啲嘢，我做我工作，點解要去食飯要去飲酒。」

狂隊5斤烈酒

雖然在以往的飯局上沒有遇過要求過火的事，但筱靖回憶最恐怖的一次：「我諗我飲得最醉嘅一次，雖然冇發生任何事，但嗰種醉我今生都唔想再試，我哋飲咗5斤中國白酒，但得幾個人，第二日我係冇力起身，有意識但好辛苦，又唔可以推，老闆會嬲會黑面！一晚有三次想走，我心痛點解我屋企從來冇要我去應酬，點解我要為咗你哋去應酬？經過呢次之後我就拒絕，因為你唔係畀咩機會我，你第二日唔會識我，我覺得我人生唔應該咁樣！」面對種種不平，筱靖誓言不會退出娛樂圈，更稱只要不阻礙生意發展的，都會爭取機會！