黃秋生去年「被絕迹」內地影壇，一部劇集《梟雄》卻成功令他「翻身」封視帝，成為香港第一個摘下影帝、視帝及劇帝的藝人。他坦言「被絕迹」一事令他陷入抑鬱邊緣，更指若事件發生在其他人身上而承受不了的話，分分鐘死得人！文：影視組

演技毋庸置疑的秋生希望未來涉獵更多範疇，並有意再執導演筒。

憑無綫劇《梟雄》勇奪視帝的秋生，自爆一度抑鬱。

影視劇三帝黃秋生因被誤指發出政治言論而「絕迹」內地影壇足足一年，他坦言事件似摧毀其多年累積的東西：「覺得自己極抑鬱，其實內地由始至終冇封殺過我，係電影投資者驚有變化，唔敢搵我啫！」對於一直被曲解有政治立場，他說：「我一向冇呢方面嘅立場，我中立對事唔對人，警察啱嘅事我都撐，只係有啲人心裏面一早有界線，用嚟釐定我啫。」

突然開竅識得笑

秋生雖未向心理醫生求助，但深知不可再沉落去：「直至上個月突然開咗竅，個人仲開心咗，以前照鏡覺得黃秋生乞人憎，依家望落個樣慈祥咗，仲識得笑。」他又直斥事件造謠者：「若呢個唔係黃秋生，有冇諗過分分鐘都死得人？搞到人跳樓自殺呀？」提到內地時有對他負面報道，他即自嘲：「都係好事，如果你冇價值搵鬼寫你咩？成日都話要做到周潤發嘅魅力、任達華嘅隨和同鄭少秋嘅優雅就冇得頂！依家有人搵我影相都舌累飯應。」

打造自家劇團

問到會否再與無綫合作，秋生透露初步有傾談：「都要寫好劇本先，今次一定係時裝，仲要喺香港拍。」他亦有意再執導演筒，將舞台劇改編並搬上大銀幕：「個古仔講兩個殺手，有同楊生（經理人公司老闆楊受成）講過，但要等我寫好劇本先。演員方面想搵白只同林雪，仲有布偉傑。」談到未來大計，他表示想將其劇團變成香港品牌，寫書、教書或去電台開咪做節目都得。

其實秋生在90年代轉戰影壇時曾長期焦慮及患上甲狀腺疾病，需長期服用醫生處方的類固醇藥物，因副作用影響而令他身體特別易吸收，常有肚餓感覺，要經常進食，體重一度急升至208磅，面容更是肥腫難分。