新一代「晶女郎」林莉嫻（Leslie）天生麗質，樣靚身材正的她，甫出道已火速彈起成為影壇新貴！身為宅男女神，當然渴望擁有多項冧仔絕技傍身，Leslie學習自製手工皂，希望收到禮物的對象感受到她的心意。對保養亦甚有心得的她更大方Share護膚秘方，就是敷Mask磨砂唔少得！文：陳丹 攝：榮

Leslie樣靚身材正，要Keep住最佳狀態，護膚及適量運動必不可少！

Leslie學製手工梘，希望有多一項絕技傍身，成為心靈手巧的宅男女神！

憑《東網Baby》彈起成為新一代「晶女郎」的林莉嫻，在《鴨王2－雞同鴨戀》孭飛做女二，戲中不乏大膽肉搏鏡頭的她，親自製作手工皂，卻坦言從未送過Handmade禮物給朋友或另一半：「我從來都未試過整手工禮物畀人，多數都係因應對方想要啲乜而買禮物送畀佢，收禮物嘅話都會鍾意收手工嘢，因為好有意義同紀念價值！」單身的她又分享擇偶條件：「揀另一半最緊要係佢心地好、人品好，對外表真係冇乜要求。」

護膚收身唔少得

手工皂愈來愈受歡迎，全因成分天然溫和，保濕效果佳，向來注重保養的Leslie說：「我都好緊張皮膚，早晚都會做晒所有美容Step，完全唔會偷懶，一星期一定敷一次保濕Mask！而拍呢套戲都有好多性感鏡頭，會Keep住跑步收身。好多女仔都會遇到個難題係背脊生粒粒，我會每兩至三個星期做一次Scrub，買咗磨砂膏都會Keep住用，令皮膚會光滑啲。」

問到極速上位是否想憑新戲取得好成績，Leslie謙虛地說：「其實都係見步行步，想法好隨遇而安，冇乜話有咩特別目標，因為暫時嚟講都係啱啱出道，所以都係做好依家嘅工作最緊要！」問到最欣賞的女藝人，她對周秀娜的評價最高：「佢畀人嘅感覺係品格好高尚，而且佢出晒名EQ高，我都好想好似佢咁，如果有機會都好想同佢合作，可以請教埋佢點訓練自己EQ！」至於男藝人則欣賞劉青雲，更表示青雲是她的理想對象：「我睇過佢好多戲，幾乎每一套我都會買飛入戲院捧場，我覺得佢啲感情戲真係演得好細膩，呢個男演員係超班嘅影帝級，佢同我嘅理想型都好接近，好細心！我好希望將來可以演到醜角，素顏出鏡完全冇問題，但就應該唔會係呢一兩年嘅事，因為覺得道行未夠，所以我好欣賞苑瓊丹，佢真係做得好出色！」

調節心理學放鬆

成為圈中人，在五光十色的演藝界打滾，Leslie承認未做好心理準備：「啱啱入行，知道會有好多緋聞，有正面、負面嘅新聞，都冇話驚唔驚，不過心理準備方面覺得做得未夠，成日都會好緊張，就算普通訪問傾偈都會出晒手汗，我都學緊點樣放鬆。我知道做呢行主要就係面對觀眾，畀娛樂大家，所以我會盡力做到最好，希望可以愈來愈好！」