徐子珊前晚在商場除夕騷上獻唱新歌,希望做真人騷及綜藝節目的她最怕遇到蛇蟲鼠蟻。而舊情人鄭俊弘與姜麗文卻同騷不同場,只差一點點便可見面,姜麗文說:「好耐都冇Single咁耐!」 文:影視組

徐子珊(左)及姜麗文與現場觀眾齊齊倒數,心情興奮!

鄭俊弘與觀眾大玩遊戲,卻與姜麗文緣慳一面。

徐子珊、鄭俊弘(Fred)及姜麗文等前晚出席在鑽石山荷里活廣場舉行的「除夕倒數2016大派對」活動,眾人大開金口,以勁歌迎接2016年。

好耐冇Single咁耐

在台上獻唱新歌的子珊特意邀來兩位Backing Singers伴唱,但她直言對出碟未感興趣:「2016年都係諗住電影,或者試吓真人騷、綜藝節目。(怕真人騷有意外發生?)唔擔心得咁多,都要研究吓係點先,只係怕到荒山野嶺遇到蛇蟲鼠蟻!」她又表示想繼續設計珠寶,更透露上月推出的系列已賣出8、9成:「有人要落柯打再訂,好開心,我哋已經籌備緊下一個Collection(系列)。」

而同騷不同場的舊情侶Fred與姜麗文雖緣慳一面,但亦算是「一起」送別2015。惟在訪問時被問到與舊愛先後同場一事時,二人均拒正面回應,姜麗文說:「關於佢嘅嘢我唔會再答喇!祝大家新年健康!(有冇異性追求?)未遇到適合嘅人,好耐都冇Single(單身)咁耐,學識咗點獨立啲!」又指單身可以有更多時間專注工作,而她將會與來自日本、韓國、美國的藝人及單位合作。

開心去年搵得多

至於Fred亦一律迴避有關姜麗文的問題,問到兩人見到面會否感尷尬,他說:「唔回應喇!(覺得主辦單位大整蠱?)唔回應喇!」當日連跑三場活動的他表示在過去一年豬籠入水:「係有史以來袋得最多,好幸運!」