榮升「蘇太」的王菀之（Ivana）剛結束蜜月之旅返港，前晚首度以人妻身份出席《Citywalk「荃」城倒數除夕派對》，她寄望新一年與老公Eric So合作大Project，提到不設防「造人大計」，Ivana超怕醜：「唔講呢啲。」　 文：音樂組

王菀之被問及造人大計即怕醜篤手指，好Cute呀！

「迷你So」送花給王菀之，「老婆仔」冧晒！

SG五位成員在台上跳唱，與歌迷迎接新一年。

周志文與一眾舉牌粉絲合照。

王菀之與組合Super Girls（SG）、陳詩欣和周志文前晚出席倒數活動，雖未見老公Eric So陪同出現，但大會找來戴圓框眼鏡的「迷你So」小男孩給Ivana送花，連Ivana都忍不住笑指似足老公！她又甜絲絲地說：「見到迷你版Eric，令我掛住大嗰個Eric（口架）！（帶埋老公嚟？）唔啦！人多佢怕醜呀！尋日先度蜜月返嚟。」問到未能與老公度除夕倒數？Ivana說：「今次倒數係我結婚後第一個新年，但其實我同佢拍拖以來都未一齊過過除夕，所以都慣咗。」

尷尬篤手指

今年可會努力造真正「迷你版Eric」？她笑說：「難講喎！（蜜月造人？）唔係，肥還肥，一人做事一人當，係食番嚟嘅！」又稱因與老公都是做創作，故很想合作Project。首個Project就是造人？Ivana即害羞玩手指：「呢啲冇得預喎！你哋啲問題搞到我好尷尬。（度蜜月不設防？）咩叫不設防？（冇用安全措施？）嘩……新年流流唔講呢啲嘢啦！」

Yanny預告「婚事」

至於SG與觀眾玩遊戲，要不靠計時器撳中「20：16」，最後由女觀眾勝出，成員Yanny差0.02成第二名，兩人都贏得智能手錶，而Yanny笑言撳到20：18，直覺2018年有新戀情會結婚！