陳智燊與宋熙年將於明年底舉行婚禮，早前兩人在中環大牌檔及便利店取景拍攝Pre-wedding照片，並邀得好姊妹李亞男、高海寧及陳爽戴上選美時贏得的后冠一同拍攝，非常特別！

（左起）李亞男、陳爽、宋熙年、陳智燊、高海寧
李亞男、高海寧和陳爽出動私伙后冠，與「準新人」熙年和Jason到大牌檔邊食邊影！

熙年和Jason在紅酒杯前鼻貼鼻，Sweet到漏！

眾人穿上禮服在便利店打書釘，夠晒特別！

穿上藍色連身裙的陳庭欣大騷煞食長腿。

無綫小生陳智燊（Jason）早前成功向女友宋熙年求婚，兩人的婚禮將於明年底舉行，昨日宋熙年出席《東張西望》革新記者會時被問到會否為節目提供獨家婚禮直播，她笑言大家要耐心等候。不過，熙年與Jason兩星期前到中環拍了一幀具有香港特色的Pre-wedding照片，由Jason構思靈感，並請來李亞男、高海寧及陳爽三位靚女姊妹齊齊穿上晚裝拍攝，最搶眼的當然是穿紅裙的準新娘熙年！

問姊妹李亞男借

熙年自爆拍攝時的論盡瘀事，她要求各姊妹事先將選美后冠從外國運返香港，但拍攝當日唯獨她忘記將后冠帶到現場，只帶了一個「吉」盒，最終要亞男借給她。熙年說：「待嫁嘅心情都係平常心，我怕到時真正結婚會有甩漏，所以叫自己咪咁緊張，最緊要享受同開心。」熙年又透露暫時不打算影婚紗相，留待結婚才穿。問到會否為高海寧介紹男友？她說：「唔使啦！佢女神嚟！點會識唔到男仔，使乜我介紹！」談到熙年的論盡事，Jason笑言當時個心離一離，又表示結婚當天會叮囑熙年不要太緊張。

陳庭欣煲「東」學主持

而於無綫節目《東張西望》記者會上，新加入主播包括陳庭欣、陳貝兒、區永權、郭嘉文及李潤庭等，舊主播則有朱凱婷、宋熙年、林映輝及吳幸美等。陳庭欣將與李潤庭拍檔，挑戰出外景採訪及寫稿，問到會否影響拍劇？她說：「之後要到越南拍劇，希望配合到。（擔心新舊人被比較？）最緊要做好自己，呢排都煲《東張》取經。」而陳貝兒腋下出汗卻不自知，影相時狂擺甫士，相當尷尬，她表示不擔心新舊人比較：「大家都係朋友，有唔同風格。」

文：影視組