關淑怡前晚開騷，發福現腩的她又音準不穩，她笑言因貪靚為雙腿搽油，以致蹺腳時跣腳唱不到歌。而她又多次在台上叫記者不要亂寫，受訪時則澄清非怕傳媒亂寫，更自爆冰島有個男朋友！

High爆搞氣氛的Shirley大騷唱功之餘，亦不忘發揮幽默本色。

Shirley與二胡大師王憓一拍即合，擦出火花。

顧芮寧（右）與Joey Tang同台表演，各有各彈騷Quali。

關淑怡（Shirley）前晚聯同顧芮寧（Elaine）及二胡大師王憓在文化中心舉行《感覺•國樂 王憓x關淑怡x顧芮寧中西樂薈萃音樂國度》音樂會，身穿Deep V緊身短裙的Shirley落力演唱，卻明顯現出小肚腩，似乎身形發福，另可能音響未調啱，令她不慎破音！

獲讚歌聲世上難求

騷上Shirley多次笑言叫記者不要亂寫：「參與今次音樂會好有意思，但咪嘥時間講咁多廢話，出面寫嘅就信，我講就唔信，所以唔講太多。」其後叫觀眾給記者輿論壓力：「你係人我都係人，咪亂寫我，多多包涵！」唱到《窗內窗外》時，她又出現音準不穩的情況，唱畢即解釋：「做藝人要聲色藝俱備，但我欠咗一樣，唔夠靚，所以腳搽咗油就靚啲，點知啲油令我蹺腳時隻腳不停跣落嚟，唱唔到歌。」她介紹Elaine出場時大讚對方音樂造詣深，卻多次將造「詣」讀成造「指」。而擔任特別嘉賓的鄧建明（Joey Tang），大讚Shirley歌聲世上難求，她卻自嘲：「唔走音嗰時囉！」最後她在台上澄清並非退休，亦非退出，叫記者不要亂寫！

唔畀阿仔學二胡

Shirley騷後受訪時被問到是否很怕傳媒亂寫？她笑說：「驚你個頭，我係搞氣氛咋！」談到音樂出現問題，她則解釋耳機有問題，又談到因搽油致跣腳，她笑稱自己幽默：「如果我講好多嘢都計數就麻煩，係笑話咋，咪咁認真，如果唔係我點你到冰島搵我男朋友，所以咪得罪我！（真係冰島有男朋友？）係呀！我講個名你去搵呀！」問到兒子是否想跟王憓學二胡？她說：「唔啦！咁要送多個耳塞畀我，你試吓屋企拉小提琴又拉二胡有乜感覺，阿仔唔講喇！但王憓送二胡忘記畀拉弓我係事實。」

文：音樂組　

攝：秦健輝