前晚榮登「勁爆新人王」的吳業坤，昨日出席活動時自爆獲緋聞女友龔嘉欣恭賀，卻直言未揀定女友，更想跟其他女仔試試發展！同場的無綫小花張秀文則以低V裙上陣，期間連聲否認與經理人的緋聞，兩人竟然不約而同「拒愛」！文：影視組

吳業坤突然唔認「陽光」兼「女神」龔嘉欣，點解嘅？

低V登場的張秀文心情大靚，笑得風騷！

密實的劉佩玥遇上性感小花張秀文即被比下去。

許廷鏗即場獻唱劇集主題曲。

吳業坤、許廷鏗、張秀文及劉佩玥昨日到油塘宣傳無綫外購劇《無心法師》，獲頒《新城勁爆頒獎禮》「勁爆新人王」的吳業坤說：「唔敢當！（有信心元旦攞埋男歌手獎？）應該冇機會，我係新人應該循序漸進。（緋聞女友龔嘉欣有冇恭喜你？）有，好多朋友都有，我覆到好夜先瞓。（打算喺頒獎台上發表愛的宣言？）等我搵到個夠好同認定嘅伴侶先。（嘉欣唔夠好？）未係一個對象，等我同其他人發展吓先。」

張秀文同經理人「同居」

而性感亮相的秀文表情多多，卻否認撻着經理人：「只係喺佢屋企租咗間房做迷你倉，因為我屋企裝修，租咗3、4個月。（你屋企豪裝要搞咁耐？）改間隔、杜白蟻，好多嘢搞。（經理人符合你擇偶條件？）依家做嘢為主，唔諗，隨緣啦！（你會幫手執埋屋？）我啲嘢都執唔掂啦，煮埋飯好冇？」她又大讚劇中無心與月牙可歌可泣的愛情令人感動！

許廷鏗爆肌有「顧慮」

另外，許廷鏗被指與劇中男主角韓東君似樣，他說：「人哋憑個劇喺內地被封小鮮肉，又爆肌！（你都考慮爆肌？）我得咩？（連續唱咗幾首主題曲，想做劇集歌王？）呢啲唔係我想就做到。」