索爆人母陳慧琳前晚在紅館舉行尾場演唱會，再度帶Cute爆兩子上台，細仔在台上大講BB話令Kelly冇晒符，他們又輪流表示掛住媽咪，場面搞笑溫馨！而當晚Kelly致謝時再變喊包，歌迷亦送上全場大合唱，場面感動！文：音樂組　攝：嚴偉國

小龍包起勢講外星BB話，睇吓哥哥同Kelly 嘅反應，就知冇人聽得明！

Kelly直角鞠躬向幫助過她的人致謝，又變喊包！

Kelly在慶功宴上與台前幕後祝酒，賀演唱會圓滿結束。

天后陳慧琳（Kelly）前晚假紅館舉行一連九場《陳慧琳let's celebrate！世界巡迴演唱會》尾場演出，獲姚子羚、歌手李幸倪、經理人小美及王晶女兒王子涵捧場，全場爆滿。一如過往幾場，Kelly換上多套歌衫大跳大唱，適逢Boxing Day，Kelly和歌迷各為對方送上大禮！

喊住90度鞠躬

Kelly播完2008年宣布結婚的片段後，即再度拖大仔「蝦餃仔」劉昇及細仔「小龍包」劉琛獻唱，老公Alex則在台下拍照，萌爆囝囝勁受歡迎，引全場歡呼！Kelly跪低在大仔耳邊教他講：「Happy new year everyone！」但教細仔時，貪玩的「小龍包」不停講BB外星話，冇人聽得明，場面搞笑！大仔臨走前跟Kelly說：「I miss you mum.」並送飛吻及攬攬，細佬見狀有樣學樣，折返講相同說話才肯落台，Kelly笑說：「佢唔輸得，哥做乜佢跟住做乜！冇見幾年，我製造咗兩件『點心』出嚟，今日最後一場，返到屋企就可以見到佢哋！」Kelly又忍不住爆喊感謝入行20年來幫過她的人，包括經理人鍾珍、家人及歌迷等，更90度鞠躬致謝。

尾聲時輪到全場歌迷合唱《誰願放手》回禮，歌迷拿着「年年月月逝去越是覺得深愛妳」的手幅，令Kelly大感驚喜！完騷後歌迷更踩地板要求Encore，Kelly即重返舞台獻唱，由於穿裙的她不方便跳舞，於是派出女助手代跳，最後演唱會圓滿落幕。

笑囝囝冇表演欲

騷後Kelly受訪時略見聲沙，她表示做完9場鬆晒，會跟鍾珍開P慶祝，又指其後要忙世巡：「想假期嗰陣開，因為啲仔唔使做功課，我先走得開同帶埋佢哋。（叫埋老公？）我會逼佢去。」她又搞笑踩囝囝沒有表演欲：「唔得啦！坐喺度，企喺度！（唔叫老公上台？）佢怕醜。」提到細仔的「BB話」，Kelly嘆氣說：「我原本想叫佢講『Happy new year』，但佢太High！」她稱為演唱會多日冇回家，之後會扮聖誕老人送禮補償囝囝。