低胸杏兒脹卜卜嫁 36歲未慣做李太

現年36歲的胡杏兒今日「升呢」做李太，與現年40歲的李乘德（Philip）結婚，早前Philip在杏兒生日派對上，在雙方家長及朋友見證下舉行訂婚儀式，而杏兒更三度爆喊，甜蜜之情盡在不言中！

由於Philip是沙頭角禾坑村圍村人兼長子嫡孫，杏兒需隨夫依照習俗，返圍村拜祠堂及祖先，燒大串炮仗祈求開枝散葉，而早前杏兒亦表示需要返沙頭角做儀式，但詳細情況就由老公安排。據知，杏兒因雙方家長均不想見報，又擔心今日婚禮有大批傳媒採訪，令夫家感到騷擾，故今日不會返回圍村進行任何儀式，待結婚儀式完成後，才擇日返圍村拜祖先，貫徹低調作風。

緊張興奮冇失眠

而今日Philip將於早上到杏兒家接新娘，中午到上水私人會所進行簽字儀式，晚上到麗思卡爾頓酒店大排筵席。為保護婚禮慎防有傳媒混入場內，每位賓客在入場前均要向酒店工作人員登記，方可入場，保安極為嚴密！

曾在微博透露為籌備婚事忙得不可開交的杏兒，揚言「婚結一次就夠了」，昨日再度發放婚紗相，穿上自家品牌「KEVOLIE」婚紗的她明艷照人，更透露事前沒有進行減肥大計：「之前我都發咗微博，講笑話結婚真係一次就夠，因為真係好忙同好多嘢搞！結婚係一生人最大嘅一件事，心情係既緊張又興奮，不過我都冇失眠，亦冇減肥，反而要食多啲，我覺得塊面太瘦，想食番脹啲。」而今日榮升李太的她，坦言對此稱號未習慣：「都要少少時間適應。以前自由慣，去邊唔需要同第二個解釋交代，依家就要學習去適應呢個身份。」

婚後兼顧家庭事業

杏兒希望婚後可以家庭事業兩者兼顧及將婚紗店擴充，她說：「結咗婚之後工作都要做，我係工作狂，都要畀心機，同埋自己啱啱轉新公司，想事業更上一層樓。另外我哋計劃緊，希望可以喺上海或者北京開分店，我喺呢門生意上都一路學習緊，自己愈做愈有興趣，希望可以做得更好，依家我嘅Partner都開始做緊Planning同物色地方。」而杏兒昨日在微博上載一對高跟鞋相，並留言：「謝謝你千辛萬苦找到世上最後的一雙給我，期待明天把他們穿上！」

婚禮由朝忙到晚

07:30 新郎Philip Lee到新娘胡杏兒家接新娘

09:00 新人到酒店斟茶給男家

11:00 新人到上水雙魚河鄉村會所

13:30 在會所內進行註冊儀式

16:00 新人離開會所返酒店

17:45 新娘胡杏兒接受訪問

18:00 嘉賓入席及新人與親友影相

20:30 新人上台切蛋糕

23:30 婚禮完結