有舞蹈底子的廖碧兒兩年前開始接觸瑜伽，本以為身體柔軟度高，定能對動作應付自如，後來才發現兩者的要求正好相反，故由零開始學習。做瑜伽需要全神貫注，除了放下手機外，亦助她去除雜念。

瑜伽動作看似簡單，實則充滿挑戰性，連呼吸都是學習重點之一！

瑜伽講求身心合一，做動作的同時有助沉殿思緒。

瑜伽有助伸展筋骨，但切記事前要先做熱身，以免拉傷肌肉！

碧兒喜歡一對一私人授課，貪其可「獨佔」導師。

Twist
先將一隻手放在後方，另一隻手放在膝蓋上，面向前深呼吸，然後慢慢將身體轉向左、右任何一方，呼氣，朝相反方向再做一次。

拉腰
伸展其中一隻手，手要過頭，頭部跟腰部線條一致，股骨要平衡貼於地上，另一隻手放在地下，雙腳打坐。

Release
雙腳以肩膊闊度打開，雙手舉起成反掌狀，盡量向上拉，猶如拉起全身，此舉有助釋出背脊骨空氣。

廖碧兒從小學習跳舞，身體柔軟度高，但數年前因傷腰動手術，令她醒覺要多加愛惜身體，急性子亦逐漸學會慢活。兩年前，她參加瑜伽課程，有舞蹈底子的她本以為要做出優美動作絕無難度，事實卻剛好相反！雖然並非心中所想，但向來愛挑戰自我的碧兒決定從BB班學起，她說：「本身有睇開瑜伽節目，見到有好多高難度動作，例如叉住條腰扭，我睇到都已經覺得痛，點可以成個人捲到好似蛇咁？雖然有跳舞底有幫助，但冇學過就去嘗試比較危險，真係扭親都唔知！好多嘢唔到你認叻，所以就由基本開始學。」

一對一 學呼吸

瑜伽講求集中，為免受其他因素影響而分心，她選擇接受一對一導師私人授課，並笑稱沒想過連簡單一個呼吸亦很重要：「好多人話玩瑜伽係學習呼吸，其實係真㗎！好多人一緊張就會Hold住道氣，同埋呼吸速度唔平均，正確方法係要用鼻呼出，速度要一樣，咪以為好簡單，其實都要學㗎！」

由於正值休息期，碧兒訂下每周運動Schedule，平均分配瑜伽、行山及健身等活動，當中以瑜伽最具挑戰性，故現時一周上三堂，問到會否挑戰高溫瑜伽？她笑說：「我本身大汗，做一個小動作已經出汗，所以普通瑜伽都OK。同埋一對一有好處，除咗唔驚畀人話啲肉凸出嚟外，佢又有多啲時間指導我有咩需要改善，例如我本身跳舞好多動作都要打開肋骨，瑜伽就啱啱相反。跳舞好彈性，可以用身體遷就動作，但用跳舞嘅邏輯做瑜伽就錯晒，瑜伽要身體四個點平衡先做動作，做完真係好舒服！」她笑言瑜伽動作看似簡單，但基本動作的難度才是最高！

抬起你低過的頭來

香港人生活繁忙，一日24小時不停思考，根本難以停下來，但碧兒學習瑜伽後整個人已放鬆下來，更在學習過程中享受寧靜，她說：「好多人成日拎住電話，除咗講電話又要覆Message，驚錯過任何嘢。不過，喺一個鐘嘅課程內，我唔會帶電話入去，盡量消除個人雜念，畀機會自己放低晒，上完堂出去成個人唔同晒！（依家提升咗興趣？）比之前有興趣，之前完全做唔到平衡動作，隻腳扭嚟扭去，但集中後就真係做到，之後都有返屋企練習。」受訪當天，碧兒更在導師Cindy指導下糾正了不少壞習慣，獲益良多！

左扭右扭Let's Warm Up

瑜伽需要做伸展動作，為免拉傷肌肉，建議先做一些簡單的動作熱身。

文：影視組　

攝：劉斌