天后陳慧琳（Kelly）前晚在演唱會上，兌現7年前的承諾，首度與大仔「蝦餃仔」劉昇和細仔「小龍包」劉琛溫馨同台冧爆Fans！其實Kelly兩位萌爆囝囝亦深受真人騷製作方及廣告商歡迎，多年來邀約不斷，但Kelly為令囝囝專注學業，不惜將半億酬勞推落海！文：專案組

Kelly帶兩位萌爆囝囝上台，又攬又拖，大晒溫馨。

在台下睇騷的Kelly老公Alex，叫兩位寶貝仔要再Chok一些。

闊別紅館多年，Kelly近日再開一連9場《陳慧琳let's celebrate!世界巡迴演唱會》，7年前她在個唱尾場宣布與老公Alex的婚訊，之後更喊爆問觀眾：「我想問如果我結咗婚，抱住個B，你哋嚟唔嚟睇我？」全場Fans齊聲答：「嚟！」前晚冬至，Kelly兌現7年前的承諾，請大仔「蝦餃仔」劉昇和細仔「小龍包」劉琛上台。

觀眾起哄叫啤多件

作女神打扮的Kelly一手拖「蝦餃仔」，一手拖「小龍包」，唱金曲《星夢情真》。「蝦餃仔」和「小龍包」甚有音樂天分，跟着節拍郁來郁去，萌爆全場！當大會大屏幕特寫「小龍包」Cute爆笑臉時，更發現現年3歲的「小龍包」愈大愈似媽咪Kelly，如同餅印，而台下睇騷的Kelly老公Alex亦大嗌，叫兩個寶貝仔要再Chok一些！最後兩子攬實媽咪不放手，不肯落台，Kelly說：「做媽咪真係唔簡單，仲難做過歌手。」唱歌後，她叫觀眾幫他們三母子影相：「影多啲相唔該！好難得呢個機會！」她又叫「小龍包」做Cute樣，小龍包即伸脷又冧笑，全場觀眾起哄！囝囝落台後，Kelly說：「大家冇見我幾年，就係咇咗呢兩件出來啦！」有歌迷大叫：「整多件！」事後Kelly在Facebook上載三母子的合照及短片：「一家團圓好日子，我們一家在紅館跟大家過冬，非常溫暖……演唱會期間，爸爸辛苦了，因為他一個人湊兩個。我喺個台上，反而好Enjoy！」

唔抗拒愛子做明星

婚後Kelly低調相夫教子，但內地親子真人騷大熱，據知不少製作組對Kelly三母子虎視眈眈，但因考慮到寶貝仔的學業及不想他們太早接觸娛圈，她忍痛推了至少近5千萬元酬金。對此其經理人鍾珍承認確有其事：「自從《爸爸去哪兒》後好多人搵，都有4、5單。（將半億掟落海？）唔係價錢問題，唔想兩個細路拍得辛苦，佢哋要返學。錢銀冇所謂，唔睇重，係兩個B嘅父母唔太想。（廣告？）有廣告搵佢哋三母子，都係拒絕晒。（Kelly畀兩個仔做明星？）Kelly唔抗拒，但等佢哋讀完書先。」因此，今次三母子同台非常難得！