林盛斌（Bob）一連兩場《Bob's up伊館2015》前晚揭開序幕，他甫開場即大玩粗口諧音，笑指自己是近年露兩點露得最多的藝人﹕「我叫阿Bob，即係Bra of the Best，承托力均勻，保護你乳暈！」隨後大爆父母房事：「細個成家人同住一房，晚上聽到嘈雜人聲，起身問爸爸使唔使幫手，佢氣來氣喘話幫緊媽媽揼骨按腳喎！」

Bob（右）邀得草蜢擔任表演嘉賓。

Bob自爆由電視營業員轉職DJ的瘀事：「當時報道梅艷芳入醫院洗肝，點知我講成『洗肛』，屈咗梅姐，我唔開心！」

談到與家中3位千金的父女情時，Bob竟借機擺郭富城與方媛的「父女戀」上枱：「啲人話我好有父愛，係喎！同郭富城一樣，一手捉住軚盤、一手捉住個女仔隻手，真係好有愛！」但講到離婚話題，有觀眾大叫周焯華，Bob即收斂：「呢個我就唔敢講咁多。」

而Bob邀得草蜢擔任表演嘉賓，更借對方名曲《永遠愛著你》向台下太太Pearl大展冧功，氹到老婆眼濕濕！完騷後，他自評全晚表現80分，而即將到來的聖誕節則希望多抽時間陪伴家人。