緋聞情侶龔嘉欣和吳業坤昨日出席劇集宣傳，慘遭同劇演員作弄，要求二人抱抱及獻吻，令他們一臉尷尬！吳業坤回應緋聞時更搵嘉欣擋駕，令嘉欣撒嬌投訴！文：影視組

談及姊弟戀緋聞，龔嘉欣坦言未過電，吳業坤則表示雙方存在輩分問題。

玩爆波遊戲時，吳業坤和龔嘉欣只肯背對背交差。

「馬家」姚嘉妮（左起）、黎諾懿、林漪娸、蔣家旻、徐榮、羅天宇和阮兒正式回歸《愛．回家》。

吳業坤、龔嘉欣和黎諾懿等昨日宣傳處境劇《愛．回家》，緋聞男女吳業坤及嘉欣成為全場焦點，兩人全程面露尷尬之色，同劇演員即整蠱他們，玩爆波遊戲時刻意要求他們面對面，但最終兩人只肯背對背完成。其後記者要求二人合照，同劇演員即起哄要吳業坤抱起嘉欣，黎諾懿更說：「冇嘢就咀埋去啦！」令兩人尷尬面紅！

有輩分問題

對於這段姊弟戀緋聞，吳業坤指嘉欣戲內戲外均很照顧他，感情跟姊弟沒分別，所以才令外間誤會，他更向嘉欣「拋波」：「家姐你幫我答啦！」嘉欣即撒嬌：「有咩理由叫個女仔擋！總之大家依家係Close嘅朋友，未過電！」

吳業坤被問到嘉欣是否他杯茶？他說：「睇報道我好似唔符合佢條件。（咁冇信心？）我依家配唔上任何女仔，事業啱啱先起步，呢啲嘢係人生另一階段。（有機會發展成情侶？）目前未能定奪，但唔知邊日黐咗邊條線就可能會，依家係姊弟，唔可以超越倫常關係！」談到現實中年紀僅相差幾個月，吳業坤笑指非年齡問題，而是輩分問題，嘉欣說：「你咁講咩意思呀！你啲History又點呀？」吳業坤笑說：「你知（口架）！謝安琪、周秀娜、黃翠如囉！」

黎諾懿歸隊

此外，即將回歸劇集的黎諾懿，對於黎耀祥及毛舜筠明年接棒孭飛處境劇，他說：「佢哋一埋位，我哋就完（口架）喇！」至於有指無綫高層出現權力鬥爭，黎諾懿表示入行12年也見過高層轉換，認為大公司管理層轉換可出現新氣象。