陳慧琳（Kelly）於紅館展開巡唱首站，開場時大露纖腰性感登場！眼淺的她談到相隔8年再開騷即眼濕濕，口震震獻唱，她表示望與粉絲齊齊走入20年的時光隧道！文：音樂組 攝：司徒國榮

Kelly大露纖腰性感登場，更與戴有頭盔的舞蹈員勁歌熱舞。

Kelly站在半天吊的Disco Ball上獻唱，場面震撼！

張家輝（左）及鍾楚紅（右）齊捧場，更被粉絲集郵。

天后陳慧琳昨晚於紅館舉行一連九場《陳慧琳let's celebrate!世界巡迴演唱會》，開騷前Kelly與雷頌德和演唱會嘉賓張家輝於紅館門口舉行拜神儀式。相隔8年再開騷的她獲丁子高及楊千嬅夫婦、黃偉文、鍾楚紅及張家輝等捧場，更有粉絲衝上前欲與眾星合照，其中家輝最為親切，不時與粉絲揮手微笑。

穿越時光隧道

甫開場，紅黑緊身衫打扮的Kelly站在半天吊的Disco Ball上登場，大露左側身性感型爆唱出《隨身聽》，與戴有頭盔的舞蹈員勁歌熱舞，最後更踩在他們背上，震撼全場！Kelly說：「隔咗8年再開騷，我都經歷咗莫大變化，有啲粉絲仲話由小學聽到中學，好榮幸大家係同我嘅歌一齊經歷。」穿上綠色長袍的她更講到想喊：「要忍住，因為要唱歌，揀歌嘅時候就好似去咗時光隧道咁，有好多美好回憶。」唱到第二首歌《唔關你事》時，Kelly走到台邊向來自內地的粉絲說：「你哋最近先落得嚟，今晚係我最愛嘅演唱會，希望都係你哋最愛嘅演唱會。」並唱出《最愛演唱會》。