「美魔女」羅霖向來護膚有道，不少朋友都希望她拍片教美容收身，故她打算明年投資7位數開美容學校，開班授徒兼做美魔女校長！

為展現美好身段，Candy不惜在寒冬下穿Tube Dress！

Candy烏身靠近，唔知醒獅有冇流鼻血呢？

Candy與一眾活動嘉賓合照留影。

有「美魔女」之稱的羅霖（Candy）昨日穿上Tube Dress谷胸出席美容活動，她透露有不少朋友着她拍片教美容收身，令她萌生開美容學校的念頭：「本身有間美容院，但我想開學校做校長，開美容營養班，想明年開，要搵個Partner，自己一個唔易籌備，預七位數以上。」

Job接Job過肥年

她表示未計內地，本月在港已有六項工作，可以過肥年，又笑言這個年紀仍有工作，呼籲大家不要自卑。問到聖誕節如何慶祝？她說：「休息一日陪小朋友，反而31號要去北京做嘢，希望早啲做完，趕返去同小朋友倒數，未試過唔同小朋友過，嗰邊叫我帶埋小朋友嚟北京倒數，但又唔知有咩啱佢哋玩。」

24小時拍攝怕失眠

提到最近不少藝人接拍內地真人騷，Candy表示亦有傾過，雖然酬勞豐厚，但因拍攝時間長而婉拒：「24小時拍住，我擔心會失眠，而且拍成三十日太耐，我有小朋友唔可以離開咁耐，我知拍完會喺內地知名度提升，但原來我喺外國出名啲，因為本寫真，有位土耳其朋友話佢嗰邊都有報道。」又表示為小朋友着想，不會考慮親子真人騷。

文：名人組